Rusiyalı milyarderlərin sərvəti ilin əvvəlindən 14,89 milyard dollar artıb...
2024-cü ilin ilk dörd ayında ən varlı iş adamlarının ümumi sərvəti 14,89 milyard dollar artıb.
Poliqon xəbər verir ki, belə məlumatla Bloomberg Billionaires Index (BBI) çıxış edib.
Bloomberg Milyarderlər İndeksində qeyd olunur ki, “Eurochem” və “SUEK”in keçmiş benefisiarı Andrey Melniçenko sərvətini daha çox artırıb. Melniçenkonun sərvəti 5,34 milyard dollar artaraq 24,2 milyarda çatıb. O, reytinqdə altıncı yeri tutub və ardıcıl ikinci ay ruslar arasında bu göstərici üzrə lider olub.
Rusiyalı sahibkarlar arasında ən zəngini “Interros” holdinqinin və “Norilsk Nikel”in prezidenti Vladimir Potanin olaraq qalır. Potanin sərvəti ilin əvvəlindən 255 milyon dollar artaraq 31,3 milyard dollara çatıb. İkinci və üçüncü yerləri “Lukoyl”un ortaq sahibi Vahid Ələkbərov və NLMK benefisiarı Vladimir Lisin bölüşdürüb.
Xatırladaq ki, BBI reytinqinə dünyanın ən zəngin 500 adamı daxildir. İndi bu siyahıya 26 rusiyalı daxildir. Onların ümumi sərvəti mayın 1-nə 348,72 milyard dollara çatıb.
Poliqon.info