Ərdoğan: Mindən çox HƏMAS üzvü Türkiyədə müalicə olunur...

Türkiyə lideri Rəcəb Tayyib Ərdoğan Fələstinin Həmas qruplaşmasının 1000-dən çox üzvünün Türkiyə daxilində xəstəxanalarda müalicə olunduğunu bildirib.

Poliqon xəbər verir ki, bu barədə İsrailin The Times of Israel qəzeti məlumat yayıb. Nəşr qeyd edir ki, Ərdoğan eyni zamanda qrupu “müqavimət hərəkatı” adlandırıb.

Ankarada Yunanıstanın baş naziri Kiriakos Mitsotakis ilə danışıqlardan sonra mətbuat konfransında danışan Ərdoğan, həmçinin Yunanıstanın HƏMAS-a terror təşkilatı kimi yanaşmasından kədərləndiyini bildirib. “The Times of Israel” yazır ki, fələstinli yaraqlılar 2011-ci ildən bəri Türkiyədə ofis saxlayırlar.

İsrail nəşrinin yazdığına görə, HƏMAS hərəkatı bu ofisi Ankaranın qruplaşmaya İsrail əsgəri Qilad Şalitin azad edilməsi ilə bağlı razılığa gəlməsinə kömək etdikdən sonra açıb. Yaraqlılar onu təxminən beş il əsir saxlayıb və 400-dən çoxu terrorizm və 600 israillinin qətlində ittiham olunaraq məhkum edilmiş 1027 fələstinli məhbus müqabilində azad ediblər.

Qeyd edək ki, HƏMAS bir sıra ölkələr, o cümlədən İsrail, ABŞ, Böyük Britaniya, Avstraliya və Kanada, həmçinin Avropa İttifaqı tərəfindən terror təşkilatı kimi tanınıb.

Poliqon.info