İsrail Pasxa bitənə qədər İrana cavab verməyəcək

Poliqon xəbər verir ki, bu barədə ABC telekanalı amerikalı məmura istinadən məlumat yayıb.

Mənbənin sözlərinə görə, vəziyyət həmişə dəyişə bilər, baxmayaraq ki, İsrailin bayramdan əvvəl hər hansı bir addım atması ehtimalı yoxdur. Rəsmi həmçinin qeyd edib ki, İran liderləri yüksək hazırlıq vəziyyətində olmağa davam edir, onlardan bəziləri "sığınacaqlarda və yeraltı obyektlərdədir".

Pasxa yəhudilərin əsas bayramlarından biridir. Bu, Bibliya hadisəsinin - yəhudi xalqının Misirdən çıxmasının xatirəsinə qeyd olunur. 2024-cü ildə Pasxa 22 aprel axşamı başlayacaq. İsraildən kənarda yaşayan yəhudilər ənənəvi olaraq bu bayramı 8 gün qeyd edirlər.

Qeyd edək ki, aprelin 13-də axşam İran aprelin 1-də İranın Suriyadakı konsulluğunun binasının dağıdılmasına cavab olaraq İsrailə doğru yüzlərlə pilotsuz təyyarə və raketlər atıb. Hücum təxminən beş saat davam edib. İsrail atılan raketlərin və pilotsuz təyyarələrin 99%-ni vurduğunu bildirib. Eyni zamanda, İran tərəfi yəhudi dövləti ərazisində bir sıra hərbi obyektlərin vurulduğunu bildirib.

Bundan əvvəl "The Wall Street Journal" öz mənbələrinə istinadən yazıb ki, İran İsrailin İran ərazisinə və İslam İnqilabı Keşikçiləri Korpusunun (SEPAH) digər ölkələrdə, xüsusilə də Suriyadakı obyektlərinə cavab zərbələri endirməsinə hazırlaşır. 

"İran bu həftə İsrailin cavabına hazırlaşır. İranın hərbiləşdirilmiş qüvvəsi olan İslam İnqilabı Keşikçiləri Korpusu Suriya ərazisindəki qurğuları üçün fövqəladə tədbirlər görüb. Bəzi SEPAH üzvləri Suriyadakı bazalarını boşaldıblar, digərləri isə bunu gecə, İsrailin zərbələrinin böyük ehtimalla həyata keçiriləcəyi bir vaxtda edirlər", deyə jurnal qeyd edib.

Nəşrin fikrincə, İran və İsrail arasında münasibətlərdə mövcud vəziyyətdə hər bir ölkə zəif görünmək istəmir və bu, regional müharibə riskini artırır.

Poliqon.info