Əli Həsənov illər ərzində tutduğu vəzifəyə hörmət gətirib, dövlətçilik ruhu verib...
“Ölkə Prezidentinin qəbul etdiyi qərar müzakirə olunmazdır, mütləqdir. Ən doğruları bilən, hər kəsin əməyini ən doğru şəkildə qiymətləndirən odur. İnsan fərqi yoxdur, harada olur-olsun, hansı sahədə çalışır-çalışsın, əsas olan onun dövlətinə, öz rəhbərinə, əqidəsinə, tutduğu yola sadiqliyidir. Əli Həsənov da məhz bu keyfiyyətlərin daşıyıcısıdır”.
PİA.az-ın xəbərinə görə, bunu Milli Məclisin deputatı, Mətbuat Şurasının sədri Əflatun Amaşov deyib.
Ə.Amaşov qeyd edib ki, Əli Həsənov illər ərzində tutduğu vəzifəyə hörmət gətirib, dövlətçilik ruhu verib: “Bu cür adamların yetişməsi asan proses deyil. Tam əminəm ki, Əli müəllim gələcəkdə də tutduğu yola daim sədaqətli olacaqdır. Yol isə dəyişməzdir - Ulu öndər Heydər Əliyevin müəyyənləşdirdiyi, Prezident İlham Əliyevin uğurla icra etdiyi nəsillərə layiqli miras kimi qalacaq şərəfli, böyük yol”.
Qeyd edək ki, Prezident İlham Əliyevin noyabrın 29-da imzaladığı sərəncamla Əli Həsənov Azərbaycan Respublikası Prezidentinin ictimai siyasi məsələlər üzrə köməkçisi - şöbə müdiri vəzifəsindən azad edilib.
pia.az