Politoloq: “Qətər və Səudiyyə Ərəbistanı arasında olan bu münaqişə regionun silahlanmasına, regionda ABŞ tərəfindən istənilməyən terror qrupların darmadağın edilməsiylə nəticələnəcək”
“Bu münaqişədən ən çox udan dövlətlərdən biri elə Rusiya olacaq”.
Bu fikirləri politoloq Zaur Məmmədov Qətər böhranının Rusiya tərəfindən yaradılması ilə bağlı iddialara münasibət bildirərkən PİA.AZ-a açıqlamasında qeyd edib.
Qeyd edək ki, ABŞ mətbuatı Qətər böhranın yaranmasında Rusiya hakkerlərini günahlandırıb. İddiaya əsasən Qətər İnformasiya Agentliyinin saytına İranla bağlı açıqlamanı məhz rus hakkerlər qoyub və bunda Kremlin məqsədi ABŞ-ın bölgədə yaratdığı anti-İran koalisiyasını dağıtmaq olub. Çünki Rusiya İranı Yaxın Şərqdə özünün əsas müttəfiqi olaraq görür. İki gün öncə isə Rusiya prezidenti Vladimir Putin Qətər əmirinə zəng edib. Rusiyanın Qətər problemində hansı geosiyasi maraqları var? Həmçinin Səudiyyə Ərəbistanın Qətərə qarşı bu qədər radikal davranmasının əsas səbəbi nə ola bilər?
Mövzu ilə bağlı politoloq Zaur Məmmədov öz fikirlərini PİA.AZ-ın əməkdaşı ilə bölüşüb.
Zaur Məmmədov: “Sərhədlərin bağlanması isə Qətər üçün ciddi problemlər yaradacaq”.
Körfəz ölkələrində baş verən gərginlikdə udan tərəfin Rusiya olacağını ehtimal edən politoloq Zaur Məmmədova görə, mövcud vəziyyətdə münaqişənin öz həllini necə tapacağı isə sual altındadır:
“Qətər böhranın yaranmasında Rusiya hakkerlərini günahlandırması ilə bağlı məlumat araşdırılır. Ola bilsin ki, doğrudan da məsələdə rus hakkerlərin əli var. Lakin, əsas məsələ bu deyil. Qətərin İran ilə bağlı “açıqlaması” və yaxud İrana dəstək verməsi məsələsi belə, məsələnin əsas mahiyyəti deyil.
İş orasındadır ki, Qətər – BƏƏ, Qətər – Misir, Qətər – Səudiyyə Ərəbistanı ilə çoxdandır ki, regionda geosiyasi toqquşmalar sezilirdi. Bir neçə il əvvəl də regionun ərəb ölkələri öz süni qardaşlarına qarşı ultimatumda bulunmuşdular. Suriyada, Liviyada, Misirdə Səudiyyə Ərəbistanın maraqları Qətər tərəfindən nəzərə alınmır. Səudiyyə istəyir ki, regionun bütün dövlətləri onun dediyi ilə oturub dursunlar. Lakin Qətər bunu etmir. Yeri gəlmişkən, Qətər ÜDM görə regionda ilk yerdədir. Ölkə kifayət qədər güclü potensiala malikdir. Lakin, eyni zamanda Qətərin importunun 40% -i Səudiyyənin payına düşür. Sərhədlərin bağlanması isə Qətər üçün ciddi problemlər yaradacaq. Amma düşünmürəm ki, münaqişə silahlı toqquşmalar ilə nəticələnəcək.
ABŞ və Rusiyaya gəlincə, hər iki ölkəyə buradakı münaqişələr sərf edir. Qətər və Səudiyyə Ərəbistanı ABŞ-ın “bir sözünü iki edən” dövlətlər deyillər. Bu iki dövlət ABŞ-ın ən yaxın müttəfiqləridir. Lakin hər iki ölkə arasında olan bu münaqişə regionun silahlanmasına, regionda ABŞ tərəfindən istənilməyən terror qrupların darmadağın edilməsiylə nəticələnəcək. Bu İranpərəst qruplaşmalardır.
Rusiyanın da hər iki ölkə ilə sıx əlaqələri var. Düşünürəm ki, Moskva münaqişədə tərəfsiz mövqe tutacaq. Ümumiyyətlə, bu münaqişədən ən çox udan dövlətlərdən biri elə Rusiya olacaq. Çünki birləşmiş vahid ərəb koalisiyası Suriyada Rusiyanın maraqlarına zidd hərəkət edir. Onların İranla bağlı mövqeləri də Rusiyanın maraqlarına ziddir. Eyni zamanda Liviyada da bu koalisiya ilə Moskvanın maraqları toqquşur. Lakin iş orasındadır ki, münaqişənin hansı istiqamət alacağı sual altındadır. Region barıt çəlləyini xatırladır”.
Gülşən ŞƏRİF
pia.az
Digərxəbərlər
Populyar xəbərlər
