Dünən hüquq müdafiəçisi Rəsul Cəfərov ifadə vermək üçün Baş Prokurorluğun Ağır Cinayətlər üzrə İstintaq İdarəsinə çağırılıb.
Bu barədə sosial şəbəkələrdə o özü məlumat yayıb: “ Səhər saat 10.00-da Baş Prokurorluğun Ağır Cinayətlər üzrə İstintaq İdarəsinə çağırılmışdım. Orada bir sıra yerli və xarici QHT-lərlə bağlı açılmış cinayət işi üzrə şahid qismində ifadə verdim. Bundan sonra mənim mənzilimdə axtarış aparıldı. Mən onlara maraqlandıqları bütün sənədləri təqdim etdim”.
Xatırladaq ki, Baş Prokurorluq ondan əvvəl hüquq müdafiəçisi Rəsul Cəfərovun ölkədən çıxmasını qadağan edib. Belə ki, iyulun 28-də axşam o, qatarla Tiflisə gedib, lakin 29-da səhər Böyük Kəsik stansiyasında sərhədçilər onu ölkədən buraxmayıblar. Məlum olub ki, qadağa iyulun 25-də qoyulub.
Ondan bir müddət əvvəl isə prokurorluğun təqdimatı əsasında Cəfərovun bank hesablarına həbs qoyulub. Bu səbəbdən də iyulun 6-da Cəfərov Kiyevdə öz bank kartlarından istifadə edə bilməyib.
Ayın 7-də “Respublika” bankında bunu “texniki problemlərlə” izah ediblər, amma sonradan hesablara həbs qoyulması haqqında məhkəmə qərarı olduğunu bildiriblər.
İyulun 16-da R.Cəfərov Səbayel Rayon Məhkəməsinə müraciət edərək hesablarına həbs qoyulması haqqında qərarın ona təqdim edilməsini tələb edib. Hələlik işə baxılmayıb...
Qeyd edək ki, Cəfərov son illər ölkənin ən fəal hüquq müdafiəçilərindən biri hesab olunur. Hazırda o, “Demokratiya naminə incəsənət” kampaniyasının koordinatorudur.
Virtualaz.org saytı onu da xatırladır ki, Rəsul Cəfərov Azərbaycandakı yeni “facebook inqilabı”nın, necə deyərlər, sözükeçən nüfuz agentlərindən biridir. O həm də qrantların əridilməsi üzrə mütəxəssis kimi tanınır. ABŞ xüsusi xidmət orqanlarının vaxtilə Azərbaycandan qovulmuş gizli əməkdaşı Rebekko Vinsentlə sıx əlaqəsi olub. Qısa müddət ərzində müxtəlif işlərə görə yüz minlərlə dollar qrant alıb. Amma bütün cəhdlərə baxmayaraq xarici mərkəzlərin onun qarşısında qoyduğu məqsədlərə nail olunmayıb.
Digərxəbərlər
Populyar xəbərlər
