DİN ETSN-nin Lerik meşələrində qızıl axtarma xəbəri ilə bağlı açıqlama yaydı...
Bu gün bəzi saytlarda Ekologiya və Təbii Sərvətlər Nazirliyinin rəhbərliyinin Lerik meşələrində qızıl axtarmaq cəhdlərinin qarşısının Lerik Rayon Polis Şöbəsinin əməkdaşları tərəfindən alınması və qazıntı aparan dəstənin üzvlərinin saxlanılması barədə məlumat yayılıb.
DİN-in mətbuat xidmətinin rəisi Ehsan Zahidov PİA.az-a bildirib ki, qeyd edilən məsələnin mahiyyəti tamamilə təhrif olunub.
Xəbərdə qazıntı aparan şəxslərin Nazirliyin əməkdaşları olduğu iddia edilsə də, bildirirəm ki, onların heç biri Nazirliyin əməkdaşları deyil, adi vətəndaşlar olub və saxlanılanların buraxılması ilə bağlı Nazirlikdən RPŞ-nə zəng edən olmayıb.
Ehsan Zahidovun sözlərinə görə yanvarın 11-də Lerik RPŞ-nə rayonun Lərmərud kəndinin inzibati ərazisində 4-5 nəfərin qazıntı işləri aparmaları barədə məlumat verilib.
Polislər dərhal qeyd olunan əraziyə gəliblər və orada 5 nəfərin bel ilə 6 kvadrat metr ərazini qazmalarını aşkar ediblər. Həmin şəxslər PŞ-nə dəvət olunub və onlardan 2-nin Bakı şəhəri, 3-nün isə Yardımlı rayon sakinləri olmaqla şəxsiyyətləri müəyyən edilib. İlkin dindirmə zamanı saxlanılan şəxslər bu hərəkətlərini qiymətli metal axtarmaları ilə izah ediblər. İzahatları alındıqdan və rəsmi xəbərdarlıq edildikdən sonra onlar buraxılıblar. Bununla belə faktla bağlı RPŞ-də araşdırmalar davam etdirilir.
pia.az