Daxili İşlər Nazirliyi istirahət günləri baş vermiş ağır yol qəzaları ilə bağlı məlumat yayıb
PİA.AZ nazirliyin mətbuat xidmətinə istinadən xəbər verir ki, fevralın 18-də saat 20 radələrində Xaçmaz rayonunun Ağyazı-Buduq kəndində Ağdam rayon sakini Zahir Məmmədovun idarə etdiyi “KamAZ” və Quba rayon sakini Elçin Əliyevin idarə etdiyi “VAZ-2106” markalı avtomobillər toqquşub. Nəticədə E.Əliyev və sərnişinləri Zülfüqar Şahbazov, Rəşid Qasımov, Cavid Əlicabbarov və İftixar Hacıyev xəstəxanaya yerləşdirilib. E.Əliyev, Z.Şahbazov və R.Qasımov xəstəxanada ölüb, digərlərinin vəziyyəti orta-ağırdır.
Xaçmaz RPŞ tərəfindən araşdırma aparılır.
Oxşar hadisə fevralın 18-də saat 6 radələrində Salyan rayonunun Yenikənd kəndində də baş verib. Masallı rayon sakini Şəmsəddin Babayevin idarə etdiyi “Mercedes Sprinter” markalı mikroavtobusla Biləsuvar rayon sakini Natiq Əliyevin idarə etdiyi “Nissan” markalı yük avtomobili toqquşub. Nəticədə Ş.Babayevin sərnişinlərindən Şəbnəm Musayeva və Asif Qardaşov hadisə yerində ölüb. Baş İstintaq və Təhqiqat İdarəsi tərəfindən araşdırma aparılır.
Dünən saat 19 radələrində Ağdaş rayonunun Ləki qəsəbəsində Şərur rayon sakini Oruc Hümbətzadə idarə etdiyi “Mercedes” markalı avtomobili su kanalına aşırıb və nəticədə hadisə yerində ölüb.
Bundan başqa fevralın 17-də saat 13 radələrində Sumqayıt şəhəri ərazisində Bakı şəhər sakini Ramin Qənbərov idarə etdiyi “Mercedes” markalı avtomobillə yolu keçən şəhər sakini Zaur Talıbovu vurub. Piyada hadisə yerində ölüb.
Sumqayıt ŞPİ tərəfindən araşdırma aparılır.
pia.az