ABŞ: Rusiya Gürcüstanı Ukraynaya qarşı müharibəyə cəlb edir...

Poliqon "Exo of Kavkaza"a istinadən xəbər verir ki, bunu ABŞ dövlət katibinin Avropa və Avrasiya üzrə köməkçisi Ceyms O'Brayen deyib.

"Gürcüstanı Ukraynada müharibəyə cəlb edən Rusiya Federasiyasıdır. Rusiya işğal etdiyi Gürcüstan ərazisində nəhəng hərbi limanın tikintisinə başlayır. Gürcüstan vətəndaşlarının oğurlanması, bəzən qətllər, ərazilərin işğalı davam edir", deyə O'Brayen bildirib.

Amerika rəsmisi Tiflisi "müdrik" qərara görə tərifləyib - Gürcüstan hökuməti Rusiya Federasiyasının istədiyi kimi Moskvaya öz ərazisindən hərbi yük və malların daşınmasına icazə verməyib.

"Rusiya Federasiyası bir müddət hərbi yükləri və ya döyüş sursatı istehsalı üçün hərbi məqsədlər üçün istifadə olunan malları Gürcüstan ərazisindən daşımağa cəhd edib. Gürcüstan hökuməti müdrik qərar verib, bacardığı qədər bunun qarşısını almağa çalışıb və bunu da edib. Ona görə də Rusiya Federasiyası Gürcüstanı bu müharibəyə sürükləməyə çalışır", deyə ABŞ rəsmisi qeyd edib.

Ötən ilin oktyabrında özünü elan etmiş Abxaziya respublikasının prezidenti Aslan Bjaniya Abxaziyanın rus qoşunları tərəfindən işğal olunmuş Oçamçir rayonunda Rusiya Hərbi Dəniz Qüvvələrinin yeni daimi bazasının yaradılacağını bəyan edib. Onun sözlərinə görə, müvafiq saziş Rusiyanın Qara dəniz donanmasının kiçik raket gəmisinin Abxaziyaya səfəri zamanı imzalanıb.

Ukrayna Müdafiə Nazirliyinin Kəşfiyyat Baş İdarəsinin nümayəndəsi Vadim Skibitski bəyan edib ki, ruslar öz gəmilərinin bir hissəsini Krımdan Novorossiyskə köçürüblər, lakin bu liman Rusiya Federasiyasının bütün gəmilərini qəbul edə bilmir, ona görə də bunun üçün Gürcüstanın işğal olunmuş hissəsindən istifadə etmək barədə qərar verib.

Poliqon.info