Almaniya Bundestaqının deputatı: "Qarabağ Azərbaycana aiddir"

“Azərbaycan-Almaniya arasında münasibətlər heç kimdə şübhə doğurmayacaq qədər aydın, səmimi və yüksək səviyyədədir”.

Bunu “Report”un Avropa bürosuna açıqlamasında Almaniya Bundestaqının (parlamentinin) hakim Xristian Demokratik Partiyasından deputatı Nikolas Löbel bildirib.

O qeyd edib ki, qarşılıqlı səfərlər, imzalanan strateji sənədlər və beynəlxalq müstəvilərdə əməkdaşlıq bu münasibətləri daha da möhkəmləndirir.

Bundestaq üzvü Almaniyanın Azərbaycanın ərazi bütövlüyünü birmənalı olaraq dəstəklədiyini də bildirib:

“Heç şübhəsiz ki, Dağlıq Qarabağ məsələsinin həlli istiqamətində hazırkı status-kvonun aradan qaldırılması zəruridir. Təbii ki, beynəlxalq hüquq normaları, ərazi bütövlüyünün pozulmaması şərtilə. Bu mənada biz Minsk Qrupunun fəaliyyətini dəstəkləyirik. Qarabağ Azərbaycana aiddir, Azərbaycanın tərkib hissəsidir. BMT-nin 4 hüquqi sənədi bu ərazilərin Azərbaycana aid olduğunu təsdiqləyir. Biz çox arzulayırıq ki, uzun zamandır davam edən bu münaqişə sona yetsin, Qafqazda sülh bərqərar olsun”, - deyə, deputat vurğulayıb.

pia.az