UEFA Avropa Liqasının bütün yarımfinalçıları məlum oldu

Aprelin 18-də UEFA Avropa Liqasının dörddəbir final mərhələsinin cavab görüşləri keçirilib

Mərhələnin mərkəzi qarşılaşması və erkən final adlandırılan görüşü Neapolda reallaşıb. İngiltərənin “Arsenal” komandası səfərdə “Napoli”nin qonağı olub. Görüş ingilislərin qələbəsi ilə başa çatıb– 1:0. Oyunda yeganə qolun müəllifi 36-ci dəqiqədə Aleksander Lakazzet olub. Beləliklə, hər iki görüşdə qalib gələn “Arsenal” turnirin yarımfinalına vəsiqə qazanıb.

Xatırladaq ki, bu komandalar arasında İngiltərədə baş tutan görüş “Arsenal”ın qələbəsi ilə başa çatmışdı - 2:0.

İspaniya dueli adlandırılan görüş “Valensiya” və “Vilyarreal” komandaları arasında təşkil olunub. Onların birinci görüşü “Valensiya”nın 3:1 hesablı səfər qələbəsi ilə başa çatmışdı. Bu yarışda da üstün oyun nümayiş etdirən “Valensiya” Toni Lato (13) və Daniel Parexo (54) vurduğu qollarla rəqibə heç bir şans verməyib. Hər iki oyunun nəticəsinə əsasən, “Valensiya” növbəti mərhələyə vəsiqə qazanıb.

Daha bir görüş Almaniyanın “Ayntraxt” və Portuqaliyanın “Benfika” arasında reallaşıb. İlk görüşdə “Ayntraxt” səfərdə 4:2 hesabı ilə məğlub olsa da, öz meydanında 2:0 hesabı ilə qalib gəlib. Ümumi hesab 4:4 olsa da, UEFA-nın reqlamentinə əsasən, Frankfurt təmsilçisi növbəti mərhələyə yüksəlib.

Nəhayət, İngiltərənin daha bir təmsilçisi “Çelsi” öz meydanında Çexiyanın “Slaviya” komandasını qəbul edib. Məhsuldarlığı ilə seçilən görüşdə qapılara 7 qol vurulub. Səfərdə minimal hesabla (1:0) və öz meydanında 4:3 hesabı ilə qələbə qazanan “Çelsi” yarımfinal mərhələsinə vəsiqə qazanıb.

Beləliklə, “Arsenal”, “Çelsi”, “Ayntraxt” və “Valensiya” qitənin ən nüfuzlu klub turnirlərindən olan UEFA Avropa Liqasının yarımfinal mərhələsinə vəsiqə qazanıblar.