Prezidentin mətbuat katibi qaydanı belə pozdu - Video

Qaydanı pozan maşın prezidentin mətbuat katibinindir

Ötən gün sosial şəbəkələrdə Prezident Administrasiyasına məxsus 10 PA 522 dövlət nömrə nişanlı BMW markalı avtomobilin İstiqaliyyət küçəsində yol hərəkəti qaydalarını kobud şəkildə pozmasını əks etdirən video yayılıb.

Musavat.com avtomobilin kimə məxsus olduğunu dəqiqləşirib. Əldə etdiyimiz məlumata görə, maşın prezidentin mətbuat xidmətinin rəhbəri Azər Qasımovun istifadəsindədir. Qarşı yola çıxan avtomobildən düşən və onun maşınına yol verilməsini tələb edən də Azər Qasımovun özüdür.

Xatırladaq ki, Prezident Administrasiyasına məxsus avtomobilin şəhərin mərkəzində yol hərəkəti qaydalarını kobud şəkildə pozmasının videogörüntüləri yayılıb. Sosial şəbəkələrdə yayılan video İstiqlaliyyət prospektinə çəkilib. 10 PA 522 dövlət nömrə nişanlı BMW markalı avtomobil qoşa xəttin tələbini pozaraq, qarşı hərəkət zolağına çıxır və hərəkətini bu cür davam etdirmək istəyir.

Qeyd edək ki, yol hərəkətinin pozulduğu yerdə günün əksər vaxtlarında DYP əməkdaşları növbə çəkir. Videodan da görünür ki, hadisə yerinin təxminən 20-30 metrliyində polis əməkdaşı dayanıb.

Bakı Şəhər Dövlət Yol Polisinin mətbuat xidmətinin rəhbəri Vaqif Əsədov Musavat.com-a bildirib ki, məzuniyyətdən yeni qayıdıb və yayılan videodan xəbərsizdir. Bununla belə, Vaqif Əsədov əmin edib ki, kimliyindən asılı olmayaraq, yol hərəkəti qaydalarını pozan sürücülər cəzalandırılır.