"Millət vəkili seçilmək istəməkdə məqsədim..." - Natiq Nəbili

54 saylı Şabran-Siyəzən seçki dairəsindən deputatlığa namizəd Natiq Nəbili seçicilərlə görüşüb.

Yenicag.az xəbər verir ki, aktiv seçki təbliğatına başlayan Natiq Nəbili Şabran rayonu Ağbaş, Ağalıq və Gəndov kəndinin sakinləri ilə görüşüb.

Kənd sakinlərini öz seçki platforması ilə tanış edən Natiq Nəbili sakinləri seçkidə iştirak etməyə çağırıb:

“Artıq 20 ildir ki, kənd təsərrüfatı sahəsi üzrə bizneslə məşğulam və şabranlılarla çox yaxın iş münasibətində olmuşam. Buradakı problemlərlə yaxından tanışam. Hər şeydən əvvəl sizə demək istəyirəm ki, seçkilərdə iştirak edin. Kimə səs verməyinizdən asılı olmayaraq seçkilərdə iştirak etməklə, siz öz gələcəyinizi müəyyənləşdirirsiniz. Mənim millət vəkili seçilmək istəməyimdə məqsədim hər hansı bir statusa yiyələnmək deyil. Sizlərin içindən çıxmış birisi kimi deyirəm ki, bunu özümə bir borc bilirəm, istəyirəm ki, cənab prezident İlham Əliyevin islahatlarının bu bölgədə reallaşmasında mənim də bir payım olsun. Sizlərin problemlərini dilə gətirim və o problemlərin həllinə birlikdə nail olaq. Ümid edirəm ki, 9 fevral günü doğru seçim edəcək və öz layiqli təmsilçinizi seçəcəksiniz”.

Seçicilərlə qarşılıqlı dialoq formasında keçən görüşdə kənd sakinləri Natiq Nəbili ilə öz təəssüratlarını bölüşüb, təkliflərini veriblər.

Məlumat üçün bildirək ki, 54 saylı Şabran-Siyəzən seçki dairəsindən deputatlığa namizəd Natiq Nəbilinin seçki qərargahı Heydər Əliyev prospektində yerləşir. Seçicilər günün istənilən vaxtı seçki qərargahına müraciət edə bilərlər.

pia.az