Bəluclar Çinin infrastruktur layihələrini həyata keçirməsinə mane olurlar

Pakistan və İran arasındakı fikir ayrılıqlarını həll etmək üçün Çin tezliklə hər iki ölkə ilə üçtərəfli görüş keçirərək terrorla mübarizə və təhlükəsizlik məsələlərini müzakirə edəcək.

Poliqon xəbər verir ki, bu ba barədə Amerikanın “Al-Monitor” saytı məlumat yayıb. Nəşrin məlumatında qeyd olunur ki, İran-Pakistan sərhədində fəaliyyət göstərən bəluc silahlı qruplarının hücumları Pekinin infrastruktur layihələrinin həyata keçirilməsini təhlükə altına qoyur. Söhbət Çinin “Bir kəmər - bir yol” təşəbbüsünün Pakistan ərazisindən keçən dəhlizindən gedir.

Qeyd edilir ki, yanvarın 16-da İslam İnqilabı Keşikçiləri Korpusu (SEPAH) Pakistandakı Bəluc yarımhərbi qruplaşmasının “Ceyş ul-Adl”ın hədəflərinə raket zərbələri endirib, İslamabad buna hava hücumu ilə cavab verib. Nəticədə ölkələr öz səfirlərini geri çağırıblar. Eskalasiya 3 gün davam edi, Pakistan hökuməti İranla diplomatik münasibətləri bərpa etməyə qərar verib.

Xatırladaq ki, Çinin “Bir kəmər, bir yol” təşəbbüsü Asiyanı quru və dəniz yolları ilə Afrika və Avropa ilə birləşdirən qlobal layihədir. Məqsəd regional inteqrasiyanı dərinləşdirmək, ticarəti inkişaf etdirmək və iqtisadi artımı stimullaşdırmaqdır.

Poliqon.info