Yeltsinin Ukraynaya qarşı müharibə ilə bağlı proqnozları ortaya çıxdı

“1992-ci ildə Rusiya prezidenti Boris Yeltsin ABŞ prezidenti Böyük Corc Buşla söhbəti zamanı Ukraynanı “sabitliyi pozan əsas faktor” adlandırmışdı”.

Bu barədə ABŞ Milli Təhlükəsizlik Arxivinin məxfilikdən çıxarılmış qeydlərində bildirilib.

Qeydlərdə Rusiya-Ukrayna münasibətləri ilə bağlı mövzular demək olar ki, bütün danışıqlarda gündəmə gəlir.

İddia olunur ki, Yeltsin mübahisələri “sülh yolu ilə” həll etməyə çalışsa da, dərhal “parlamentdəki millətçi qruplar”dan gələn təhdidlərlə bağlı nağıllar uydururdu. Yeltsin Ukraynanın ilk prezidenti, kommunist Leonid Kravçuku dəstəkləyirdi və onun guya Ali Radada ukraynayönlü qüvvələrlə “qarşılaşdığı” “daxili təzyiqi başa düşürdü”.

Söhbətlərin birində Yeltsin deyib ki, Ukrayna “bizim üçün sabitliyi pozan əsas faktordur”. Lakin Buşu əmin edib ki, “Rusiya-Ukrayna münasibətlərində Yuqoslaviya davası olmayacaq”.

Qeyd olunur ki, həmin dövrdə Ukrayna, Qazaxıstan və Belarus bütün nüvə silahlarını Rusiyaya təhvil verməklə bağlı razılıqlarını bildiriblər.(oxu.az)

pia.az