Rusiya prezidenti Vladimir Putin amerikalı həmkarı Co Baydenlə iyun ayının 16-da Cenevrə şəhərində keçiriləcək görüşdə müzakirə olunacaq ən vacib məsələni açıqlayıb.
Musavat.com xarici agentliklərə istinadən xəbər verir ki, Rusiya lideri bununla bağlı düşüncələrini yerli “Rossiya 1” kanalına verdiyi müsahibədə söyləyib.
Kremlin sahibinin sözlərinə görə iki ölkə arasında müzakirələrin əsas mövzusu kibertəhlükəsizliyin təmin edilməsi üzərində olacaq.
Bundan başqa RF prezidenti rəsmi Moskvanın kibercinayətkarları ABŞ-a təhvil verə biləcəyini söyləyib. Lakin onun fikrincə bütün bunlar qarşılıqlı surətdə həyata keçirilməlidir.
Vladimir Putin prezident Co Baydenin Strateji hücum silahlarının məhdudlaşdırılması haqqında sazişin (SSM-3) müddətinin uzadılması barədə qərarını alqışladığını bildirib və bunu yüksək peşəkarlığın göstəricisi adlandırıb.
Rusiya liderinin fikrincə, bununla bağlı qərar Vaşinqton tərəfindən təsadüfi deyil, situasiyanın peşəkar təhlili nəticəsində qəbul olunub. (Musavat.com)
pia.az