Türkiyədə zəlzələdən sonra bəzi şəhərlərdə məktəblər bağlanıb

PİA.az Türkiyə mətbuatına istinadən xəbər verir ki, Fövqəladə Hallar Nazirliyinin (AFAD) saytında yer alan məlumata görə, Düzcenin Gölyaka rayonunda saat 04:08-də 5,9 bal gücündə zəlzələ qeydə alınıb. Gölyaka rayonunda zəlzələnin 6,81 kilometr dərinlikdə baş verdiyi müəyyən edilib.

Düzcenin Gölyaka rayonunda baş verən 5,9 bal gücündə zəlzələ İstanbul, Bolu, Sakarya, Ankara, Kocaeli, Kütahya, Biləcik, Bursa, Eskişehir və İzmirə qədər geniş ərazidə hiss olunub.

Kandilli Rəsədxanası zəlzələnin maqnitudasını 6.0 olaraq yenidən qiymətləndirib.

Düzce, Sakarya, Bolu və Zonquldak şəhərlərində isə təhsilə 1 günlük fasilə verilib.

Sakarya qubernatoru Çetin Oktay Kaldırımda zəlzələ ilə əlaqədar şəhərdə təhsilin bir günlük dayandırıldığını açıqlayıb. Kaldırım sosial media hesabından verdiyi açıqlamada deyib:

“Əziz həmvətənlər, Düzcedə baş verən və şəhərimizdə də hiss edilən zəlzələ ilə əlaqədar 23 noyabr 2022-ci il tarixində vilayət üzrə bütün təhsil müəssisələrində təhsil bir günlük dayandırıldı. Bütün həmvətənlərimə keçmiş olsun”.

Bolu valisi Erkan Kılıç isə Düzcedə baş verən zəlzələdən sonra şəhərdə 20 nəfərin yaralandığını açıqlayıb. Kılıç açıqlamasında: “Yaralıların həyati təhlükəsi yoxdur. Bəzi binalarda çatların meydana gəldiyi Boluda təhsilə bir gün ara verildi”, deyə qeyd edib.

Zonguldakın Ereğli rayonunda hiss edilən 5,9 bal gücündə zəlzələ səbəbindən təhsil bir gün müddətinə dayandırılıb. Ereğli Vilayət Qubernatorluğu da xəstələrə, hamilələrə və əlillərə bir günlük istirahət verib.

pia.az