Şəhid zabitin nəşi təyyarə ilə Naxçıvana aparılıb

Ermənistan silahlı qüvvələrinin bölmələri tərəfindən törədilən təxribat nəticəsində şəhid olmuş Azərbaycan Silahlı Qüvvələrinin baş leytenantı Əli Əliyevin nəşinin Naxçıvan Beynəlxalq Hava Limanında qarşılanma mərasimi olub.

"Report"un xəbərinə görə, tədbirdə Naxçıvan Muxtar Respublikası Ali Məclisinin sədri Vasif Talıbov, dövlət və hökumət nümayəndələri, şəhidin ailə üzvləri tədbirdə iştirak ediblər.

Şəhidin üçrəngli bayrağımıza bükülmüş cənazəsi hərbçilərin müşayiəti ilə mərasim yerinə gətirilib.

Şəhidin cənazəsi doğulduğu Şərur rayonunun Yengicə kəndinə yola salınıb.

Qeyd edək ki, sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycanla dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Ə.Əliyev düşmən təxribatının qarşısını alan zaman qəhrəmancasına şəhid olub.

pia.az