“Nuhun gəmisi”nin qalıqları ilə bağlı araşdırmalara başlanıldı

PİA.az Türkiyə mətbuatına istinadən xəbər verir ki, aralarında geofizika, kimya və geoarxeologiya üzrə mütəxəssis və akademiklərin də daxil olduğu qrup tərəfindən sahədən götürülmüş nümunələr müayinə üçün İTU laboratoriyalarına göndərilib.

Şərqi Anadolu Bölgəsinin xəritəsini çəkmək üçün Türkiyə Silahlı Qüvvələrinə (TSK) məxsus təyyarə ilə bölgəyə gedən xəritə mühəndisi kapitan İlhan Durupınarın 11 sentyabr 1959-cu ildə Doğubəyazıt rayonunun Telçəkər və Üzəngili kəndləri arasındakı ərazidə kəşf etdiyi “Nuhun gəmisi”nə aid olduğu iddia edilən qalıqlar yerli və xarici turistlərin diqqətini çəkir. Hər il artan sürüşmə təhlükəsi ilə üzləşən qalıqda nəhəng çatlar əmələ gəlib. Sürüşmə nəticəsində strukturu zədələnən xarabalıqlarda elmi araşdırmalar aparmaq üçün AİÇÜ ilə İTU arasında əməkdaşlıqla Ağrı Dağı və Nuhun Gəmisi Araşdırma Qrupu yaradılıb. Akademik əməkdaşlıq protokolu çərçivəsində yaradılan komanda bölgədə ilk araşdırmasını aparıb.

Yol xəritəsi müəyyən olunacaq

AİÇÜ rektor müavini Prof. Dr. Faruk Kaya dünya gündəmində olan Nuhun gəmisi araşdırması ilə bağlı İstanbul Texniki Universiteti ilə araşdırmaya başladıqlarını bildirib. Gördüyü işlər barədə danışan Prof. Dr. Kaya deyir:

“Ağrı dağı həm geoloji, həm geomorfoloji xüsusiyyətləri, həm də Nuhun gəmisinə ev sahibliyi etdiyi inancı ilə dünyada tanınan bir dağdır. Ağrı İbrahim Çeçen Universiteti olaraq biz 2003-cü ildən bəri bu işin üzərində çalışırıq. Daha ətraflı araşdırmalar aparmaq üçün İTU ilə işləmək istədik. İTU bu baxımdan ən təchiz olunmuş universitetlərdən biridir. Biz İTU ilə həm Ağrı dağında peyk fotoları ilə işləmək, həm də 1959-cu ildə İlhan Durupınar tərəfindən kəşf edilən Telçəkər və Üzəngülü kəndləri arasındakı təbii quruluşu araşdırmaq üçün işləmək istədik. 2 universitetin akademiklərindən ibarət işçi qrupu yaratdıq. AİÇÜ və İTU rektorlarının himayəsində yaradılmış işçi qrupu ilə sahəyə getdik. Telçəkər və Üzəngili kəndləri arasındakı təbii quruluşu, yəni Nuhun gəmisinin siluetinə bənzəyən quruluşu araşdırdıq və tikilinin üzərindəki geniş bir sahədən daş və torpaq nümunələri götürdük. Bunları İTU-ya göndərdik. Professorlar laboratoriyalarda araşdırma etdikdən 1,5-2 ay sonra nəticə çıxar. Bu nəticələrə əsasən, yol xəritəsini müəyyən edəcəyik. Bizim geofizika, kimya və arxeologiya tədqiqatlarında xüsusi təchizatlı və bacarıqlı ekspert müəllimlərimiz var. Onlarla birlikdə bu sahədə georadar görüntüləmə edərək yol xəritəsini təyin edəcəyik. Nəticələrdən asılı olaraq, yaz aylarında iki universitet arasındaki yeni görüşlərlə Ağrı dağı, Telçəkər və Üzəngili kəndlərində Nuhun gəmisi qalıqları ilə bağlı araşdırmanı davam etdirəcəyik”.

pia.az