İstiqlal Muzeyində “Arzular…” adlı tədbir – sərgi keçirildi

Oktyabrın 4-də saat 12:oo - da Azərbaycan İstiqlal Muzeyində 44 günlük Vətən Müharibəsi şəhidlərinin xatirəsini yad etmək və vətənpərvərliyin təbliği məqsədi ilə ötən ildən etibarən davam edən “Qəhrəmanlar Can Verir Yurdu Yaşatmaq üçün” adlı layihə çərçivəsində “Arzular…” adlı tədbir – sərgi keçirildi.

Müasir tariximizə qızıl hərflərlə yazılan və tarixi zəfərlə başa çatan 44 günlük Vətən müharibəsindən artıq iki il ötür. 30 il gözlənilən bu möhtəşəm zəfər Ali Baş Komandan İlham Əliyevin rəhbərliyi ilə güclü Azərbaycan Ordusunun və xalqının həmrəyliyi nəticəsində əldə olundu. 44 gün davam edən haqq savaşımız tarix boyu şanlı qürur mənbəyimiz olaraq qalacaq.
Tədbirdə əşyaları nümayiş olunan şəhidlərin ailə üzvləri çıxış edərək Vətən, torpaq uğrunda unudulmaz tarix yazan, gənc ömürlərinə böyük qəhrəmanlıqlar sığdıran cəsur Vətən oğullarından bəhs etdilər. Bildirildi ki, 30 ilə yaxın müddətdə düşmən işğalında olan torpaqların azad olunmasında canından keçən qəhrəman şəhidlərimiz heç vaxt unudulmayacaq, onlar hər birimizin qəlbində əbədi yaşayacaqlar.

Sonda tədbir iştirakçıları polkovnik-leytenant Abdurahmanov Əfqan, mayor Kərimov Tofiq, tibb xidməti leytenantı Xəlilbəyli Turqut , Əfəndiyev Adil, gizir Səmədov Nicat, Qasımov Təbriz, əsgər Həsənov Sərxan, Babayev Mustafa, Mehdiyev Seymura məxsus, muzeyin fondlarında qorunub saxlanılan 120-ə yaxın müxtəlif şəxsi əşyaların nümayiş olunduğu sərgi ilə tanış oldular.
Tədbirdə şəhid ailələri, Milli Aviasiya Akademiyasının tələbələri, “Böyük Qayıdış ”, “Əbədi Birlik” Gənclər İctimai birliklərinin nümayəndələri və digər qonaqlar iştirak etdilər.

Sərgi oktyabrın 10-a qədər davam edəcək.

pia.az