Zooparkda koronavirusa yoluxma qeydə alınıb

ABŞ-ın San-Diyeqo şəhərindəki zooparkların birində 9 yaşlı erkək irbisdə koronavirus infeksiyası aşkarlanıb.

İrbisin bir başqa adı qar bəbiridir. Qar bəbirlərinin sayı dünyada getdikcə azalır. Bu heyvan növü məhv olma həddindədir.

Novator.az saytı ABŞ-ın “Associated Press” agentliyinə istinadla bildirir ki, ötən həftə zoopark işçiləri bəbirin öskürdüyünü müşahidə ediblər. Müayinə aparılıb, bəbirin koronavirusa yoluxduğu üzə çıxıb.

İnfeksiyaya yoluxmuş bəbirdə öskürək və burun axmasından başqa digər simptomların olmadığı bildirilir. Ancaq xəstə bəbir digər Amur bəbirləri ilə bir qəfəsdə saxlandığına görə həmin heyvanların da infeksiyaya yoluxduğu ehtimal edilir. Ona görə başqa heyvanlar da karantinə alınıb, zooparkın bəbirlər olan hissəsi müvəqqəti bağlanıb.

Bəbirin infeksiyaya haradan yoluxduğuı məlum deyil.

“Associated Press” xatırladır ki, yanvarda San-Diyeqonun Safari parkındakı digər zooparkda səkkiz meymunda koronavirus aşkarlanıb. Həmin meymunlar bu xəstəliyə koronavirusu gizli, simtomsuz keçirən zoopark işçisindən yoluxubmuş.

Bundan sonra heyvanların COVİD-19 infeksiyasına qarşı peyvəndlənməsi zərurəti yaranıb. Vaxtilə ABŞ-ın “Pfizer” əczaçılıq şirkətinin nəzdində fəaliyyət göstərmiş “Zoetis” baytarlıq şirkəti koronavirusa yoluxma riski olan heyvanları, o cümlədən bəbirləri peyvəndləyib. Ancaq San-Diyeqoda COVİD-19-a yoluxan 9 yaşlı erkək bəbir peyvənd olunmayıbmış.