Həqiqətənmi təhsilə və səhiyyənin inkişafına ayrılan pullar boşuna xərclənir?..

Təhsil eksperti: “Mən Fazil bəyin fikirinə haqq qazandırıram. Çünki istər səhiyyədə, istərsə də təhsildə hər hansı mütərəqqi inkişafı hiss etmirik”.

“Səhiyyəmizin bərbad olmasının bir çox səbəbləri var. Məlumdur ki, Azərbaycanda səhiyyə sahəsinə aid bir universitet var. İkinci universitetin yaranmasına imkan vermirlər”.

Bu sözləri təhsil eksperti Elçin Əfəndi millət vəkili Fazil Mustafanın təhsil və səhiyyə haqqında dediyi fikirləri PİA.az-a şərh edərkən qeyd edib.

Bu gün Milli Məclisdə çıxış edən deputat Fazil Mustafa deyib ki, təhsil sahəsində tətbiqi tədqiqatlara 4 milyon manat ayrılır. Səhiyyəyə də ayrılır. Bu formal rəqəmlərdir. Bizdə nə təhsil sahəsində, nə də tibbdə tədqiqat aparılmır.

Deputat təhsil müəssisələrində idman infrastrukturunun olmamasından narazılığını ifadə edib:

“Universitetlər içərisində də tək Ali Neft Məktəbində və UNEC-in yeni korpusunda idman infrastukturu qurulub. Digərlərində isə yoxdur. Bu o deməkdir ki, biz tələbəni universitetə bağlayan bir infrastrukturdan məhrumuq. İdman infrastrukturunun olmaması universitetlərin reytinqinə də təsir edir”.

Mövzunu PİA.az-ın əməkdaşı təhsil eksperti Elçin Əfəndi ilə müzakirə edib.

Elçin Əfəndi: “Distant təhsildən sonra sanki təhsil sahəsi tənəzzül dövrünü yaşayır”.

Təhsilin inkişafı üçün ayrılan vəsait düzgün xərclənsə, hansısa nailiyyətə nail olmağın mümkünlüyünü düşünən ekspert PİA.az-a açıqlamsında qeyd edib ki, təhsil sahəsinə kifayət qədər pul ayrılır, nəticəsi isə olmur:

“Mən Fazil bəyin fikirinə haqq qazandırıram. Çünki istər səhiyyədə, istərsə də təhsildə hər hansı mütərəqqi inkişafı hiss etmirik. Buraya bəzi universitetlərin fərdi qaydada əldə etdikləri uğurlar aid deyil.

Səhiyyəmizin bərbad olmasının bir çox səbəbləri var. Məlumdur ki, Azərbaycanda səhiyyə sahəsinə aid bir universitet var. İkinci universitetin yaranmasına imkan vermirlər. Əgər Tibb Universitetinin əlavə alternativi olarsa, rəqabət olar. Rəqabətin gedişatında da səhiyyə sahəsində nəysə əldə edə bilərik.

Səhiyyəyə ayrılan pulların lazımı yerlərə sərf edilməməsi fikrində də Fazil müəllim haqlıdır. Çünki səhiyyə sahəsinə nə qədər vəsait ayrılsa da, təssüflər olsun ki, dövlət xəstəxanalarında rüşvətin olduğu hər birimizə bəllidir. Bunun da qarşısını almaq üçün səhiyyə sistemində müvafiq islahatlar aparılmalıdır.

Elçin Əfəndi: “Səhiyyə sahəsinə nə qədər vəsait ayrılsa da, təssüflər olsun ki, dövlət xəstəxanalarında rüşvətin olduğu hər birimizə bəllidir”.

Təhsil də ən aşağı vəziyyətdədir. Distant təhsildən sonra təhsil sahəsi tənəzzül dövrünü yaşayır. Təhsilin inkişafı üçün ayrılan vəsait düzgün xərclənsə, hansısa nailiyyətə nail olmaq olar.

Qeyd edim ki, təhsil sahəsində bəzi məsələlərə ayrılan vəsait itmir. Məsələn Prezident tərəfindən modul tipli məktəblərin tikilməsinə vəsait ayrılır. Qəzalı vəziyyətdə olan, yaxud da məktəbləri olmayan kəndlərdə həmin vəsait hesabına məktəblər tikilir. Amma elə təhsil sahələri də var ki, oraya pul ayrılır, nəticəsi isə olmur. Bütün bunlara görə də Fazil müəllimin fikirlərinə haqq qazandırıram”.

Nərminə UMUDLU
pia.az