Mariupolda çoxmərtəbəli binanın dağıntıları altından 200-ə yaxın meyit tapılıb

Mariupolda çoxmərtəbəli binanın dağıntılarının altından 200-ə yaxın çürümüş cəsəd aşkar edilib.

Bu barədə Mariupol merinin müşaviri Petr Andryuşenko öz “Telegram” hesabında bildirib.

“Mariupol. Qəbiristanlıq. Sülh prospektində, şəhər ətrafındakı yanacaqdoldurma məntəqəsi-2 ərazisində çoxmərtəbəli binanın dağıntıları altından, zirzəmidən yüksək dərəcədə çürümüş vəziyyətdə olan 200-ə yaxın meyit aşkar edilib”, – deyə Andryuşenko birbaşa çıxışı zamanı açıqlama verib.

Onun sözlərinə görə, yerli sakinlər ölənlərin meyitlərini toplamaqdan və paketləməkdən imtina etdikləri üçün Rusiya Fövqəladə Hallar Nazirliyi oranı tərk edib. Ölənlərin meyitləri yerində qalıb və indi qismən yığışdırılan dağıntılar səbəbindən, demək olar ki, bütün məhəllədə çürük cəsəd qoxusu hiss olunur.

Andryuşenko onu da əlavə edib ki, şəhərdə çoxmərtəbəli binaların həyətlərindən tapılan meyitlərin yenidən basdırılması prosesi faktiki olaraq dayanıb.

Hazırda dəfn və ekshumasiya işləri Donetskdən olan qondarma “Ritual” Dövlət Korporasiyası tərəfindən həyata keçirilir. Ancaq “rəsmi” pulsuz dəfnetmə üçün növbə gözləmək, mərhumun meyitini “morq”a sərbəst şəkildə şəxsən gətirmək, cəsədin yeni aşkar edildiyini söyləmək və ya mərhumun Ukrayna ordusu tərəfindən öldürüldüyünün söylənməsinin labüd olduğu videoçəkilişə razı olmaq lazımdır.

Andryuşenko vurğulayıb ki, metro yaxınlığındakı müvəqqəti morqda bu şərtlər səbəbindən çox sayda meyit küçədə torbalara yığılaraq qalıb. Beləliklə, Mariupol indi tamamilə qəbiristanlığa çevrilib.

pia.az