Maduro avqust ayında müxalifətlə dialoq aparmaq niyyətindədir

Venesuela Prezidenti Nikolas Maduro bildirib ki, gələn ay Meksikada müxalifətlə dialoq aparmaq niyyətindədir. Maduro bəyan edib ki, danışıqlar Norveçin vasitəçiliyi ilə baş tutacaq və Birləşmiş Ştatların bu prosesi dəstəkləyəcəyinə ümid bəsləyir. Müxalifət may ayında strategiyasını dəyişib və Venesuelada siyasi böhranı həll etmək üçün danışıqlara geri dönmək niyyətində olduğunu bildirib.

Maduro 2013-cü ildə vəzifəyə gələndən bəri bir zamanlar inkişaf edən Venesuelada iqtisadiyyat çökməyə başlayıb. Maduro ölkə daxilində rəqibləri, habelə Birləşmiş Ştatlar və Avropa İttifaqı tərəfindən korrupsiyada, insan haqları pozuntularında və 2018-ci ildə keçirilən seçkiləri saxtalaşdırmaqda ittiham olunur. İyun ayında Vaşinqton, Brüssel və Ottavada yüksək vəzifəli diplomatlar müxalifətlə dialoqun azad və ədalətli seçkilərə doğru əhəmiyyətli irəliləyişə gətirib çıxaracağı təqdirdə Maduro hökumətinə qarşı sanksiyaları yenidən nəzərdən keçirməyə hazır olduqlarını bildiriblər.

“Mən sizə deyə bilərəm ki, biz Meksikaya getməyə hazırıq” – deyə, Maduro dövlət tərəfindən maliyyələşdirilən "Telesur" televiziya şəbəkəsinə müsahibəsində bildirib. Xuan Quaydonun başçılıq etdiyi Venesuela müxalifəti sə Maduronun Birləşmiş Ştatlar və digər ölkələrdən gələn diplomatik və sanksiya təzyiqləri fonunda bundan əvvəlki danışıqlardan vaxt qazanmaq üçün istifadə etdiyini bildirir. Müxalif qruplar bildirib ki, onlar Maduro hökuməri ilə prezident və parlament seçkilərinin şərtlərini müzakirə etməyə hazırdırlar. Maduro isə danışıqlarda diqqətin ABŞ-ın maliyyə və neft sektorlarını hədəf alan sanksiyalarının aradan qaldırılmasına yönəlməsini istədiyini deyir. ("Amerikanın səsi")