Əcnəbi turist Zaqatala dağlarında itkin düşüb - Yenilənib

Daxili İşlər Nazirliyi hindistanlı turistin Azərbaycan dağlarında itkin düşməsi barədə açıqlama verib.

DİN-in Mətbuat Xidmətinin Şəki regional qrupundan bildirilib ki, mayın 17-də Daxili İşlər Nazirliyinin “102” Xidməti-Zəng Mərkəzinə turist kimi ölkəmizə səyahət edən Hindistan Respublikasının vətəndaşı, sonuncu dəfə Zaqatalada olan 1993-cü il təvəllüdlü Kondaveeti Manikath adlı şəxsin itkin düşməsi ilə bağlı müraciət daxil olub:

“Daxil olmuş müraciət əsasında aparılan ilkin araşdırma zamanı onun Zaqatalada qaldığı hoteli mayın 12-də tərk etdiyi və Car kəndinin çətin relyefə malik yüksək dağlıq ərazisinə getdiyi müəyyən olunub.

Hazırda Rayon Polis Şöbəsinin, eləcə də Ekologiya və Təbii Sərvətlər Nazirliyinin aidiyyəti strukturunun əməkdaşları həmin şəxsin tapılması istiqamətində axtarışlara cəlb olunublar. Nəticəsi barədə əlavə məlumat veriləcək”.

***

Hindistanlı turist Azərbaycan dağlarında itkin düşüb.

Oxu.Az-ın məlumatına görə, Kondaveeti Manikath adlı hindistanlı Zaqatala rayonunun dağlıq ərazisində yoxa çıxıb.

İki gündür ki, turistin tapılması üçün axtarışlar davam etdirilir.

pia.az