“Azəristiliktəchizat”a borc üzündən Bakıda şagirdlər soyuqdan donur

PİA.az-a şagirdlərin valideynlərinin verdiyi məlumata görə, Ağdam şəhər 38, Ağdam şəhər 39, Füzuli şəhər 45 və Şuşa şəhər 7 nömrəli məktəbin şagirdləri qış düşəndən bəri sinif otaqlarında soyuqdan donmaq üzrədir.

Məktəbdə oxuyan şagirdlərin valideynlərindən daxil olan şikayətdə bildirilir ki, noyabrınmn 15-dən bəri məktəblərdə qızdırıcı sistemlər işlədilmir. Valideynlərin çoxu uşaqlarını məktəbə göndərmir. Hər sinif otağında 2-3 şagirdə dərsə gəlir. Dərsə gələn şagirdlər isə 2 dərsdən sonra müəllimlər tərəfindən evə göndərilir. Çünki müəllimlər özləri də sinif otaqlarında otura bilmirlər.

Valideynlər bildirir ki, problemdən Təhsil nazirliyinin də məlumatı var, lakin məktəbə istilik verilməsi ilə bağlı heç bir addım atılmır.

Məlumata görə, şəhərcikdə yalnız bir qazanxana mövcuddur. Bu qazanxana həm şəhərcikdə binaların, həm də məktəblərin istilik təminatını həyata keçirir. Lakin iki dövlət qurumu arasında həll edilməyən problemə görə qazanxana işlədilmir.

Belə ki, “Azəristiliktəchizat” borca görə qazanxananı işlətmir və dolayısı ilə məktəblər də isinmir. Bunun cəzasını isə əksəriyyəti azyaşlı uşaqlar olan məktəb şagirdləri çəkir.

Problemin həllinə isə heç kim yaxın durmur; nə Təhsil nazirliyi, nə “Qaçqınkom”, nə də “Azəristiliktəchizat”.

pia.az