Erməni hərbiçilərinin Qarabağa gətirilməsinə Azərbaycan niyə göz yumur?...
Hərbi-ekspert: “Azərbaycan bu məsələdə bir qədər daha sərt mövqe tutmalıdır”.
“Düşünmürəm ki, Qarabağda olan mülki əhali orada mövcud olan erməni silahlı bölmələrini komplektləşdirmək üçün yetərli olsun”.
Bu sözləri hərbi-ekspert Ədalət Verdiyev Ermənistan ordusunun polkovniki Saak Saakyanın verdiyi son bəyanatı PİA.az-a şərh edərkən qeyd edib.
Ermənistanda artıq açıq şəkildə bildirirlər ki, onlar müqavilə xidmət edən hərbiçilərini Qarabağa göndərirlər. Son olaraq bu barədə Ermənistan ordusunun polkovniki Saak Saakyan bildirib. Bütün bu baş verənlər isə sülhməramlıların gözü qarşısında və onların razılığı ilə baş verir.
10 noyabr üçtərəfli bəyanatın 4-cü bəndinin Ermənistan və Rusiya sülhməramlıları tərəfindən bu qədər kobudcasına pozulmasına Azərbaycan niyə göz yumur? Bəs niyə Azərbaycan həmin hərbiçilərə qarşı əməliyyat həyata keçirmir ki, problem birdəfəlik həll olunsun?
10 noyabr üçtərəfli bəyanatının həm Ermənistan, həm də Rusiya sülhməramlıları tərəfindən pozulmasının səbəblərini PİA.az-ın əməkdaşı hərbi-ekspert Ədalət Verdiyev ilə müzakirə edib.
Ədalət Verdiyev: “Birmənalı olaraq Qarabağda Ermənistandan olan və müqavilə ilə xidmət edənlərin sayı kifayət qədərdir”.
Azərbaycanın özünə qarşı təhdid törədən erməni silahlılarının legitim hədəf elan etməli olduğunu düşünən ekspert PİA.az-a bildirib ki, bu baş verməyənə qədər Qarabağda ermənilərin Azərbaycana qarşı təhdid törətməsi hallarına, orada sülhməramlıların gözü qarşısında birgə bəyanatın şərtlərinin kobudcasına pozulması hallarına daim rast gələcəyik:
“Ermənistan ordusunun polkovniki Saak Saakyan verdiyi bəyanatda vəziyyəti bir az fərqli şəkildə şərh edir. O deyir ki, biz Qarabağa bu dəfə də çağırışçıları göndərmədik. Qarabağda olan silahlı qüvvələr orada yaşayan əhalinin hesabına formalaşır.
Bütün bunlara baxmayaraq mən düşünmürəm ki, Qarabağda olan mülki əhali orada mövcud olan erməni silahlı bölmələrini komplektləşdirmək üçün yetərli olsun. Təbii ki, birmənalı olaraq Qarabağda Ermənistandan olan və müqavilə ilə xidmət edənlərin sayı kifayət qədərdir.
Azərbaycan bu məsələdə bir qədər daha sərt mövqe tutmalıdır. Bu məsələdə Rusiya sülhməramlıları funksional olaraq öz vəzifə borclarını artırmalıdır. Azərbaycan özünə qarşı təhdid törədən erməni silahlıları legitim hədəf elan etməlidir. Bu baş verməyənə qədər Qarabağda ermənilərin Azərbaycana qarşı təhdid törətməsi, orada sülhməramlıların gözü qarşısında birgə bəyanatın şərtlərinin kobudcasına pozulması hallarına daim rast gələcəyik”.
Nərminə UMUDLU
pia.az