“Kayrat” komandası qəza ilə bağlı açıqlama yayıb - Yenilənib

Konfrans Liqasının qrup mərhələsində “Qarabağ”a Bakıda 1:2 hesabı ilə məğlub olan və Qazaxıstana qayıdarkən Almatıda qəzaya uğrayan “Kayrat” klubu hadisə ilə bağlı açıqlama yayıb.

Apasport.az saytının məlumatına görə, klub Almatı Hava Limanında avtomobillə toqquşan təyyarənin futbolçu və məşqçi heyətini ölkəyə qaytaran təyyarənin olduğunu təsdiqləyib.

Ancaq hadisə zamanı heç kimin xəsarət almadığı vurğulanıb: “Həqiqətən də, “Kayrat” klubunun futbolçuları və məşqçilər heyəti hadisə zamanı göyərtədə idilər. Xoşbəxtlikdən heç kim xəsarət almayıb. Komanda bir müddət təyyarədə qalıb, sonra klubun bazasına yola düşüb. Oktyabrın 24-də “Astana” ilə keçiriləcək vacib matçın hazırlığı bu gün axşam başlanacaq”.

Qeyd edək ki, “Kayrat”ı Bakıdan Qazaxıstana qaytaran təyyarə Almatı Hava Limanında “Renault” markalı avtomobillə toqquşub.

***

Qazaxıstanın "Kayrat" komandasını Bakıdan aparan təyyarə qəzaya uğrayıb.

"Report"un Sports.ru-ya istinadən məlumatına görə, fövqəladə hadisə Almatı beynəlxalq aeroportunda baş verib. "FlyJet" aviaşirkətinə məxsus təyyarə "Renault" avtomobili ilə toqquşub.

Hadisənin təfərrüatları öyrənilir. Faktla əlaqədar Hərəkət təhlükəsizliyi və hava nəqliyyatının istismarı qaydalarının pozulması maddəsi ilə cinayət işi qaldırılıb, istintaq araşdırmaları aparılır.

Qeyd edək ki, oktyabrın 21-də "Kayrat" Tofiq Bəhramov adına Respublika stadionunda UEFA Konfrans Liqasının qrup mərhələsinin III tur matçında "Qarabağ"ın qonağı olub. Görüş Azərbaycan təmsilçisinin qələbəsi ilə yekunlaşıb.

pia.az