““Şimal axını-2” layihəsi dayandırılmalıdır”

Ukrayna prezidenti Pyotr Poroşenko Rusiyanın Baltik dənizi vasitəsilə çəkdiyi “Şimal axını-2” qaz kəmərinin tikintisinin dayandırılmasına çağırıb və bunu bütün Avropa üçün təhlükəli layihə olduğunu deyib

AzVision.az xəbər verir ki, Poroşenko bu barədə öz tvitter hesabında yazıb. “Şimal axını-2” iqtisadi layihə deyil, o, Avropanın bütövlüyünə zərər vurur və dayandırılmalıdır.” - deyə Ukrayna prezidenti bildirib.

Xatırladaq ki, bir neçə gün əvvəl Rusiya xarici işlər naziri Sergey Lavrov "Şimal axını-2" qaz kəmərini Avropa üçün tamamilə iqtisadi əsaslı və faydalı layihə adlandırıb. Onun sözlərinə görə, bu qaz kəməri hazırda Ukraynadan Almaniyaya çəkilən kəmərdən iki dəfə qısadır. Bu baxımdan tranzitin qiyməti də indikindən ucuz olacaq. Moskvada onu bildirirlər ki, Rusiya sahillərindən Baltik dənizinin dibi ilə Almaniyayadək çəkiləcək “Şimal axını-2” qaz kəməri həmçinin, Avropaya kəsintisiz və etibarlı qaz nəqlini təmin etmək məqsədilə çəkilir. Çünki Ukrayna ilə olan siyasi münasibətlər, həmçinin bu ölkə üzərindən qaz tranziti həcminin azaldılması problemlər yaradır.

Qeyd edək ki, Ukrayna ilə yanaşı, ABŞ da Almaniyanın Rusiya ilə "Şimal axını-2" qaz razılaşmasını imzalamasına qəti etiraz edir və iddia edir ki, bununla Avropanın Rusiyadan qaz asılılığı daha da artacaq. Həmçinin, Vaşinqtona görə, "Şimal axını-2" qaz kəmərinin təhlükəsizliyini bəhanə edərək, Moskva gələcəkdə Baltik dənizindəki hərbi mövcudluğunu gücləndirəcək.

pia.az