Politoloq Nəzakət Məmmədova yazır
Suriya ordusu İdlibdə əməliyyatlara başlayır, Türkiyə isə bu gün Afrinə hücum edib.
Baxmayaraq ki, Rusiya ilə Türkiyə Astana və Soçi danışıqlarında Suriyada 4 deeskalasiya zonası yaratmaq barədə razılıq əldə etdilər, hətta 5-cinin yaradılması qərara alındı. Amma Rusiyanın Türkiyəyə qarşı tutduğu mövqe ucbatından təyyarə böhranından sonra yenidən iki ölkə arasında münasibətləri pisləşə bilər. Dekabrın 11-də Putin Suriyada olarkən Əsədi müşayiət edən generalları arasında "Pələng qüvvələri" komandanı general Suheyl Aslanın da olması diqqət cəkdi. İŞİD-i Fəratın şərqindən təmizləyən Əsəd ordusunun "Pələng güclərinin" komandanının Putinlə görüşdə iştirakı yaxın vaxtlarda əməliyyatların davam edərək İdlibə qədər uzanmasına və Rusiyanın razılığına işarə idi.
Türkiyəyə yaxın bəzi müxalif qüvvələrin İdlibdə olması, Afrində isə PYD/YPG-nin silahlılarının Rusiya və ABŞ himayəsində olması Türkiyəni çətin duruma salır. Gerasimovun dekabrın sonunda İŞİD-dən sonra Təhrir üş-Şam qruplaşmasını məhv edəcəklərini deməsi əməliyyatların Türkiyə sərhədinədək uzanacağından xəbər verir. Türkiyə İdlibə hücumla bağlı Suriya-Rusiya-İran razılaşmasından narahatlığını bildirib. İdlib Dəməşq və Hələbi birləşdirən magistral yolun üzərində olan strateji şəhər kimi əhəmiyyətlidir. Lakin burada Türkiyəyə sadiq 25 min müxalif silahlı var. Görünən odur ki, artıq Cenevrə danışıqlarına Soçi formatı ilə qarşı duran Rusiya və İran Türkiyəyə ehtiyacı olan zaman yaxınlığa məcbur olsalar da, öz məqsədləri üçün müttəfiqlik öhdəliklərinə uyğun olmayan işlər çevirməyə başlayıblar. Türkiyənin Afrinə hücumu bu baxımdan doğru addımdır.
Gülşən ŞƏRİF
pia.az
Digərxəbərlər
Populyar xəbərlər
