“Rabitə işi”nin məhbusları bəraət istəyir

“Rabitə işi”ndə təqsirləndirilərək məhkum olunanların hamısı apelyasiya şikayəti veriblər

Bakı Ağır Cinayətlər Məhkəməsindən verilən məlumata görə, 3 nömrəli Rabitə Təmir Tikinti, Rabitə Mülki Tikinti MMC-lərin direktoru Emin Məmmədov, Aztelekom MMC-nin sabiq baş mühasibi Oktay Rüstəmov, Bakı Telefon Rabitəsi İstehsalat Birliyinin keçmiş baş mühasibi Anar Mustafayev və Optik Qurğular İdarəsinin rəisi Namazəli Məmmədov apelyasiya şikayəti veriblər.

Məlumat üçün bildirək ki, bundan əvvəl Nəqliyyat, Rabitə və Yüksək Texnologiyalar Nazirliyinin keçmiş aparat rəhbəri Vidadi Zeynalov, Aztelekom MMC-nin sabiq baş direktoru Məhəmməd Məmmədov, Bakı Telefon Rabitəsi İstehsalat Birliyinin sabiq rəhbəri Beytulla Hüseynov apelyasiya şikayəti ilə məhkəməyə müraciət ediblər. Onlar apelyasiya şikayətlərində günahsız olduqlarını və barələrində bəraət hökmünün çıxarılmasını istəyirlər.

Onların şikayətlərinə Bakı Apelyasiya Məhkəməsində baxılacaq.

Qeyd edək ki, Bakı Ağır Cinayətlər Məhkəməsinin hökmü ilə Vidadi Zeynalovla Beytulla Hüseynov 13 il, Namazalı Məmmədov 11 il, Emin Məmmədov 10 il, Anar Mustafayev 5 il, Qəmbər Bəybalayev 3 il müddətinə azadlıqdan məhrum edilib.

Məhəmməd Məmmədov, Oktay Rüstəmov, Səhrab Hümbətov, Cəfər Cəfərov və Bayram Vəliyevə şərti cəza verilib. Həmin şəxslər məhkəmə zalından azadlığa buraxılıb.

Məhkəmə təqsirləndirilən şəxslərin əmlaklarının müsadirə olunması barədə qərar çıxarıb. Həmin əmlakların gəliri nazirliyə dəymiş ziyanın ödənilməsinə yönəldiləcək.

Məhəmməd Məmmədovun üzərində əmlak müəyyən olunmadığı üçün müsadirə edilməyib. RYTN-nin mülki iddiası isə qismən təmin edilib. (cebhe.info)

pia.az