“Qəbələ” Futbol Klubunun prezidenti Tale Heydərov “Əlincə”nin bazasını almağa hazırlaşır
Fanat.az-ın əldə etdiyi məlumata görə, klub prezidenti 15 milyon manat qiyməti olan stadion və digər tikililər, o cümlədən sözügedən klubun rəhbərinə məxsus otellə yaxından maraqlanır.
Bir müddət öncə mətbuat səhifələrində satıldığı bildirilən idman qurğusunun qiymətiylə bağlı razılıq əldə etmək başlıca hədəfdir. T.Heydərov bu iş üçün artıq 2 nəfər ayırıb və danışıqlar davam etdirilir.
Məqsəd kompleksi Ronaldinyonun adını daşıyacaq futbol akademiyasının ixtiyarına verməkdir.
“AzPolitika.info” onu da əlavə edir ki, “Əlincə” Futbol Klubu 2010-cu il aprelin 5-də “Bağçalı Evlər” MTK-nın rəhbəri Hacı Məhərrəm Novruzov tərəfindən təsis edilib. Klubun adı Naxçıvandakı Əlincə qalası ilə bağlıdır. Klubun akademiyası – “Əlincə” İdman Akademiyası Masazır kəndi, Novxanı şossesi ərazisində yerləşir. “Əlincə” İdman Akademiyasının tərkibinə 4 kiçik yardımçı stadion, 5000 nəfərlik süni örtüklü və Masazır qəsəbəsinin “Qurtuluş 93″ yaşayış kompleksində yerləşən 13 min yerlik təbii ot örtüklü stadion daxildir. Qısa müddətdi yaranmasına baxmayaraq, rəhbərliyin diqqət və qayğısı nəticəsində klubun bazası genişləndirilmiş, Azərbaycan Futbol Federasiyaları Assosasiyasının (AFFA) bayrağı altında keçirilən çempionatlarda iştirak üçün lisenziya almışdır.
Yaranmasından cəmi bir il sonra 2011-ci ilin noyabr ayında 5000 nəfərlik stadion istifadəyə verilib və müxtəlif səviyyəli turnirlər və çempionatlar məhz bu stadionda keçirilib.
“Əlincə” klubunun tərkibində futboldan əlavə digər idman növləri də var ki, bunlara misal olaraq, voleybol, karate, üzgüçülük və s. göstərmək olar.
Texniki şərait olaraq “Əlincə” klubu Bakıda 2 üstüörtülü, 4 üstüaçıq süni örtüklü, 2 təbii örtüklü və bir futzal olmaqla 9 stadiona sahibdir. Əlavə olaraq futbolçuların daimi yaşaması üçün iki mehmanxana, yeməkxana, restoran, trenajor zalı, üzgüçülük hovuzu, sauna fəaliyyət göstərir.
Bundan əlavə, “Əlincə” klubunun Şabran rayonunda da təlim məşq bazası var. Burada komanda üçün təlim-məşq toplanışları keçirmək üçün istənilən şərait yaradılıb. 3 təbii və 1 süni məşq meydançası, futbolçuların qalması üçün 6 mərtəbəli otel, koteclər, restoran, meyvə bağı futbolçuların ixtiyarına verilib.
“Əlincə TV”nin bir müddət əvvəl yayımladığı videosujeti təqdim edirik.