“Azərbaycan müəllimi” qəzetinin keçmiş baş redaktoru Valeh Mirzə ilə müsahibəni təqdim edirik
-Valeh müəllim, hazırda harada çalışırsınız?
- Heç yerdə işləmirəm. Düz 7 ildir işsizəm. 1981-84-cü illərdə müəllim işləmişəm, sonrakı illərdə isə pedaqoji mətbuatda çalışmışam. «Azərbaycan pioneri» (indiki "Savalan") və "Azərbaycan müəllimi" kimi mötəbər qəzetlərdə müxbir, baş redaktor müavini, baş redaktor olmuşam. Yeni Azərbaycan Partiyasının üzvüyəm.
- Siz özünüz işdən çıxmısınız, yoxsa çıxarıblar?
- Formal olaraq öz ərizəmlə çıxmışam, əslində isə çıxarılmışam.
- Bu, nəylə bağlı oldu?
- Bu çox uzun söhbətdir, ancaq qısaca onu deyə bilərəm ki, məhz nöqsana yol vermədiyimə görə işdən çıxarılmışam. Xahiş edirəm bu məsələni çox dərinləşdirməyin, o günlər yadıma düşəndə dünya başıma fırlanır.
- İşlə təmin olunmaq üçün kimlərə müraciət etmisiniz?
- Ötən il Mətbuat Günü münasibətilə keçirilən tədbirdə mənim məktubum Cənab Prezidentə əlbəəl təqdim olunub. Şübhəsiz o da təhsil nazirinə ünvanlayıb ki, təbdir görülsün, amma… nə isə hələ ki bir nəticə yoxdur.
- Hakimiyyəti təbliğ edən yazar kimi tanınırsınız. Hətta buna görə bir neçə dəfə müxalifət mətbuatının tənqidlərinə də tuş gəlmisiniz. Bütün bunlara rəğmən əməyiniz qiymətləndirilibmi?
- Mən haqqı təbliğ və müdafiə edirəm. Mükafatımı da Ulu Tanrıdan gözləyirəm.
- Prezident Administrasiyasının kitabxanasında dövlətçiliklə bağlı yazılarınız, kitablarınız yer alıb.
- Ən gözəl kitabımı hələ çap etdirməmişəm. İşsizlik ucbatından 4 kitabım sandıq ədəbiyyatına çevrilib. İnşallah düzələr. Əlli illik yubileyim ərəfəsində Misir Mərdanov mənim haqqımda Prezidentə təqdimat göndərmək əvəzinə işdən çıxartdı. Mükafatım da bu oldu. Amma o işdən çıxarılanda mən hədsiz dərəcədə kövrəldim, - heç olmasa bir müddət balalarım onun çörəyini yeyib, - düşündüm. Mən belə tərbiyə olunmuşam, nə edim?! İki dövlət qəzetinin baş redaktoru ola-ola ömrüm boyu kirayənişin olmuşam. Bunu hamıdan yaxşı nazir bilirdi. Görünür ürəyi daşdan imiş.