Qobustan həbsxanasında cəza çəkən siyasətçi Nemət Pənahlıya ailəsi ilə uzunmüddətli görüş verilib
Məhbusun həyat yoldaşı Həcər Pənahlı açıqlamasında deyib ki, görüş yanvarın 26-da olub:
“Üç gün qaldım, Neməti heç yaxşı görmədim. Yarımcan olub, oranın şəraiti də bərbad gündədir, üstəlik özüm də xəstələnmişəm. Nemətin səhhəti heç yaxşı deyil, şəkər xəstəliyi ona çox əziyyət verir. Həkimə müraciət etməyin mənası yoxdur. Gündəlik şəkər dərmanı qəbul edir, vəssalam. Onun səhhətinə saxlanma şəraiti təsir edir. Əfv sərəncamının ona şamil olunmayacağını əvvəlcədən bilirdi. Mənə də deyirdi ki, “gözləmə, məni əfvə salmayacaqlar”.
Hazırda Nemətin həbsxanasında heç bir problemi yoxdur. Tək otaqlı kamerada qalır, yanına digər məhbuslar salınmır. Ona belə daha rahatdır. Nə aparmışıqsa, götürüblər, problem yaratmırlar. İctimiyyətdə gedən məlumatları radiodan dinləyir”.
6 övlad atası olan Nemət Pənahlı 2011-ci il yanvarın 8-də tutulub, xuliqanlıq və qəsdən sağlamlığa az ağır zərər vurma ittihamı ilə 6 il müddətinə azadlıqdan məhrum edilib.
Nemət Pənahlı 1988-ci ildə başlayan milli azadlıq hərəkatının öncül simalarından, Azərbaycan Xalq Cəbhəsinin qurucularından olub.(modern.az)
pia.az