İqtisadiyyat və Sənaye Nazirliyi restoran və kafelərdə yoxlamalar aparıb
Yoxlamalar zamanı müştərilərə təklif edilən yeməklərin hazırlanmasında keyfiyyətsiz, köhnə ərzaqlardan istifadə olunduğu aşkarlanıb.
Bu barədə virtualaz.org saytına nazirlikdən məlumat veriblər.
Xəbərdə deyilir ki, Sumqayıt şəhəri, Nizami küçəsi, 3/54-də fəaliyyət göstərən “Osmanlı” kafesində, 20 Yanvar və N.Nərimanov küçələrinin kəsişməsində iş adamı Murad Bağırova məxsus “Bibər Pizza” restoranında, 34-cü məhəllədəki “Street Food” kafesində istifadəyə yararsız ərzaqlardan istifadə edildiyi aşkarlanıb. 6-cı mikrorayon, 1 ünvanındakı “Halal süfrə” kafesində isə hazırlanan yeməklərdə istifadə edilən ərzaqların istehsal sənədləri təqdim edilməyib.
Bundan əlavə, Bakı şəhəri, Nizami rayonu, Q.Qarayev prospekti, 74 ünvanındakı “Mimino” restoranında, R.Rüstəmov küçəsi, 2404 ünvanındakı “Kometa” restoranında yeməklərin sağlamlııq üçün təhlükəli köhnə ərzaqlardan hazırlanması faktları aşkarlanıb.
Bu, hələ yalnız yoxlama aparılan kafe və restoranlarda aşkarlanan nöqsanlardır. “Binə”, “Sədərək” və digər yarmarkalarda, şəhər mərkəzindən kənar ərazilərdəki yeməkxanalarda hər gün yüzlərlə insan keyfiyyətsiz yeməklərlə qidalanır. Daha doğrusu, hər gün zəhərlənirlər.
Doğrudur, nazirlik cərimələr tətbiq edir. Amma təəssüf ki, yalnız cərimə tətbiqi vəziyyəti dəyişmir...
pia.az