Ucarda “Kurtlar Vadisi” adlı cinayətkar dəstənin işi ilə əlaqədar həbs edilən Fuad Hüseynovun anası mətbuat nümayəndələrinə müraciət edib
Süsanə Hüseynova iddia edir ki, oğlu 2010-cu il oktyabrın 14-də şərlənərək həbs edilib. Müraciətdə bildirilir ki, Fuad Hüseynovun qondarma ittihamlarla həbs edildiyi beynəlxalq təşkilatların hesabatlarında da yer alıb.
“Ölkədaxili bütün məhkəmə instansiyalarını keçsək də, ədalətsiz, sifarişli qərarlar çızarıldı. Pulumuz və yüksək vəzifədə qohumumuz olmadığı, ortada həm də sifariş olduğu üçün məhkəmələr qanunları yox, sifarişi əsas tutdular. Nəticədə 3 ildən çoxdur ki, Fuad həbsdə, biz isə burda əziyyət çəkirik. Qondarma zərərçəkən Akif Cəmşid oğlu Cəfərov məhkəmələrdə açıq etiraf etdi ki, 3 iyul 2010-cu il tarixdə saat 18 radələrində Fuad bizə qarşı heç bir cinayət törətməyib, yarandır, biz sifarişlə özümüzə bıçaqla xəsarət yetirərək, Fuadı şərləmə planını həyata keçirmişik. Bu cinayət işinin qondarma olmasını 27 şahid, 1 zərərçəkən ifadəsində etiraf edib, sorğu əsasında sənədlər əldə edilib, audio və video materiallar var. Zərərçəkənlər bu barədə KİV-də də çıxışlar ediblər”.
Məhkum anası iddia edir ki, oğlunun yeganə günahı Ucarın hüquq-mühafizə orqanlarının “Kurtlar Vadisi” qruplaşması ilə əlaqələrini ictimailəşdirməsinidir.
Süsanə Hüseynova prezident İlham Əliyevə də müraciət edib və oğlunun günahsız olduğunu bildirib.
Qeyd edək ki, həmin cinayətkar dəstənin qurbanlarından biri də keçmiş vicdan məhbusu Taleh Xasməmmədov olub. O, prezidentin 26 dekabr 2012-ci il tarixli əfv fərmanı ilə azadlığa buraxılıb. Fuad Hüseynov isə Ucar rayon məhkəməsinin 26 sentyabr 2011-ci il tarixli hökmü ilə 6 il 6 ay müddətinə azadlıqdan məhrum edilib.(musavat)