Hakim idarə müdirinin məhkəməyə məcburi gətirilməsi haqda qərar qəbul etdi
Sentyabrın 17-də Şəki Apelyasiya məhkəməsində “İsmayıllı işi” məhkəməsinin apelyasiya şikayəti üzrə növbəti prosesi keçirilib.
Məhkəmə hakimin vəkillərin mantiya geyinməsini təqdirəlayiq sayması ilə başladı. Sonra ötən məhkəmə iclasında baxılmamış vəsatətlərə yenidən baxdı. Hakim adı işdə şahid kimi keçən İsmayıllı Elektrik Təchizatı və Satışı İdarəsinin rəisi Əliağa Bədəlovun xəstə olduğu üçün məhkəməyə gələ bilmədiyini bildirdi. Müttəhim Anar Həsənli isə replika verərək “necə xəstədir ki, hər gün işə gedir” dedi. Vəkillər təklif etdilər ki, Ə.Bədəlova zəng edib onu prosesə çağırsınlar.
Bu zaman Tofiq Yaqublu “Xoşqədəmi çağırın onu gətirsin” replikası verdi. Müttəhimlərin və onların vəkillərinin israrlarından sonra hakim Əliağa Bədəlovun məhkəməyə məcburi gətirilməsi barədə qərar qəbul etdi.
İsmayıllı məhbusu Şükran Möhübəliyev İsmayıllı Polis İdarəsinin rəisi Nizami Qocayevin də prosesə gətirilməsi ilə bağlı vəsatət verdi. Dövlət ittihamçısı isə onun gəlməyinin nəyi dəyişəcəyini bildirdi. Şükran “imkan verin gəlsin, bəlkə sizin xeyrinizə danışacaq” - dedi.
Hakim müttəhim Vasif İbrahimovun ANS telekanalının işçilərinin şahid kimi məhkəməyə gətirilmələri ilə bağlı vəsatətini təmin etdi.
Prosesdə həmçinin işlə bağlı video çəkilişlər nümayiş olundu. Obyekriv tv-nin İsmayıllı hadisələri ilə bağlı çəkdiyi süjetə baxıldı. Bu zaman süjetlə Tofiq Yaqublunun verdiyi ifadələrin ilə üst-üstə düşdüyü aydın göründü.
Tofiq Yaqublu:
- Axı siz nə istəyirsiniz? 26 cild niyə yalan yazırsınız?
İlqar Məmmədov hakimdən söz istəyərək dedi:
- Birinci instansiya məhkəməsinin 135 gündə 17 məhkəmə prosesi oldu və bu müddət ərzində hökm də oxundu, ancaq 117 gündə apelyasiya məhkəməsi hələ də bitməyib.
Proses sentyabrın 18-də davam edəcək.(musavat)
Digərxəbərlər
Populyar xəbərlər
