Qarsdan İqdıra gətirilən Seyidov xəstəxanada müayinədən keçiriləndən sonra idarəyə aparılıb
Fəzail Ağamalı: “Bununla bağlı Dövlət Gömrük Komitəsinə müraciət edin”
Sərdar Cəlaloğlu: “Türkiyədə cinayət törətməyən şəxsi həbs etmirlər”
Dünən Qarsa gedən Sədərək Gömrük Məntəqəsinin rəisi Mirməhəmməd Seyidov təyyarədən düşən kimi Türkiyənin Mütəşəkkili Cinayatələrə Qarşı Mübarizə İdarəsinin əməkdaşları tərəfindən tutulub. Qarsdan İqdıra gətirilən Seyidov xəstəxanada müayinədən keçiriləndən sonra idarəyə aparılıb.
PİA.AZ Sədərək Gömrük Məntəqəsi rəisinin Türkiyədə həbsinə Milli Məclisin deputatı, iqtidaryönlü Ana Vətən Partiyasının (AVP) sədri Fəzail Ağamalı və Azərbaycan Demokrat Partiyasının (ADP) sədri Sərdar Cəlaloğludan münasibət öyrənib.
AVP sədri Fəzail Ağamalı bu məsələnin ona aidiyyatının olmadığını bildirib: “Bunun mənə nə dəxli var. Bu məsələni siyasiləşdirməyə və siyasətçiləri bununla bağlı danışdırmağa ehtiyac yoxdur. Bununla bağlı hər hansı vəkilə və ya Dövlət Gömrük Komitəsinə müraciət etsəniz daha yaxşı olar”.
ADP sədri Sərdar Cəlaloğlu Mirməhəmməd Seyidovun tutulmasının təfsilatı barədə məlumatlı olmadığını desə də, bu hadisəni Türkiyədəki son həbslərlə əlaqələndirir: “Türkiyə demokratik, hüquqi dövlətdir. Burada cinayət törətməyən şəxsi həbs etmirlər. Görünür Mirməhəmməd Seyidovun əməlində hər hansı qanunsuzluq olub və bu səbəbdən saxlanılıb. Güman edirəm ki, bu İrandan Türkiyəyə çirkli pulların daşınması ilə bağlıdır. Görünür Sədərək Gömrük Məntəqəsi də bu prosesdə iştirak edirmiş”.
Azər Niftiyev
pia.az