“Fənərbaxça” mövsümlərarası fasilədə ikinci transferini rəsmən açıqlayıb. Apasport.az-ın klubun rəsmi saytına istinadən məlumatına görə, “sarı-lacivərdlilər” bu dəfə əcnəbi futbolçu ilə anlaşıblar
Belə ki, öncə “Trabzonspor”dan Mehmet Ekicini transfer edən İstanbul nəhəngi bu dəfə “Lion”un yarımmüdafiəçisi Matyu Valbuenanı heyətinə qatıb. 33 yaşlı hücumameyilli oyunçu ilə hərtərəfli razılıq əldə edilib.
“Fənər”, həmçinin Fransa millisinin sabiq üzvünün klubu “Lion”la da ortaq məxrəcə gəlindiyini yayıb: “Matyu Valbuena və klubu “Lion”la aparılan danışıqlar müsbət nəticələnib. “Transfer pəncərəsi” açıldıqdan sonra futbolçu ilə rəsmi müqavilə imzalanacaq”.
Qeyd edək ki, ötən mövsüm “Lion”un heyətində 43 matçda iştirak edən Valbuena 10 qol və 8 assistlə yadda qalıb.
pia.az