“Facebook” şirkəti istifadəçi məlumatlarının sızması ilə bağlı qalmaqaldan sonra ilk dəfə olaraq maliyyə hesabatını təqdim edib
Lent.az-ın “The Wall Street Journal” nəşrinə istinadən verdiyi xəbərə görə, şirkət ilk rübdə gəlir və mənfəətinin artdığını açıqlayıb.
Belə ki, hər səhmə görə gəlir 1,69 dollar artıb. Ötən ilin ilk rübündə bu rəqəm 1,04 dollar idi. Gəlirlər 50% artaraq 11,97 milyard dollar, xalis mənfəət isə 63% artaraq 5 milyard dollar təşkil edib. Bu nəticələr analitiklərin gözləntilərini aşıb.
Şirkət rəhbərliyi etiraf edib ki, platformanın tənzimlənməsinə daha çox diqqət ayırmaq və buna hər hansı sarsıntıya yol vermədən nail olmaq lazımdır. “Facebook” reklamvericilərin iş şərtlərini dəyişməyəcək, sosial şəbəkənin hər hansı funksiyasını ləğv etməyəcək və ya müştərilərə pulu xidmət təklif etməyəcək.
Xatırladaq ki, “Facebook”un 87 milyon istifadəçisinin şəxsi məlumatlarının Britaniyanın “Cambridge Analytica” konsaltinq firmasının əlinə keçdiyi məlum olduqdan sonra böyük qalmaqal başlayıb. Şirkətin bazar dəyəri aşağı düşüb, bir çox istifadəçi, hətta tanınmış şəxslər və qurumlar sosial şəbəkədən uzaqlaşıb. Mark Zukerberq qalmaqalla bağlı ABŞ Konqresində 5 saat ifadə verib.
Baş verənlərə baxmayaraq, 2018-ci ilin ilk rübündə sosial şəbəkədə 70 milyon yeni istifadəçi qeydiyyatdan keçib və “Facebook”un auditoriyası 2,2 milyard nəfərə çatıb.
pia.az