“Əli Kərimli Cəmil Həsənlini qısqanır”
PİA.AZ xəbər verir ki, bu barədə AzVision.az-a partiyadan çıxarılan cəbhəçi özü məlumat verib.
A.Tanrıverdioğlu partiyadan səbəbsiz yerə çıxarıldığını deyərək partiya rəhbərliyinə qarşı kəskin ittihamlar səsləndirib.
“Ötən gün AXCP-nin Respublika Günü ilə bağlı məclisi toplandı. Məclis bayram gününün qeyd edilməsini müzakirə etmək məqsədilə toplansa da istiqaməti dəyişdirildi. AXCP-nin rayon təşkilatları konfranslara hazırlaşır, belə vaxtda partiyaya yeni üzvlər qəbul etmək Nizamnaməyə ziddir. Buna baxmayaraq, kimliyi heç kimə məlum olmayan 3 nəfər partiyaya üzv qəbul edildi. Mən də öz iradlarımı bildirdim. Buna görə də məni partiyadan xaric etdilər.
Eyni zamanda “Azadlıq” qəzetini də məhkəməyə verəcəyəm, bu qəzetə uzun illər yardım etmişəm”.
Keçmiş cəbhəçi iddia edir ki, partiyadan xaric olunanların sifarişçisi sədr Əli Kərimlidir: “Bir müddət əvvəl mən onlara narazılığımızı bildirmişdim. Hazırda AXCP-də baş verələrin ən böyük günahkarı Əli Kərimlidir. Baş verənlərin sifarişçisi Əli Kərimli, icraçısı isə Fuad Qəhrəmanlı və Gözəl Bayramlıdır. Bir müddət əvvəl bir neçə gənc qanunsuz olaraq partiyadan uzaqlaşdırılmışdı, bizim etirazımız nəticəsində bu qərar ləğv olundu. Hazırda demokratiya adı altında ən böyük diktatorluğu edən partiya rəhbərliyi və onun müavini Fuad Qəhrəmanlı bu prinsiplə yaşayır ki, kim onların əleyhinə danışsa, həmin adamlar partiyadan uzaqlaşdırılmalıdır”.
A.Tanrıverdioğlunun fikrincə, Əli Kərimli Milli Şuranın sədri olmaq istəyir.
“Əli Kərimli Milli Şuranın sədri olan Cəmil Həsənlini qısqanır, onun postuna göz dikib. Partiyanın sədr müavini Fuad Qəhrəmanlı mitinqlərdə Cəmil Həsənlinin yox, ancaq Əli Kərimlinin çıxış etməsini istəyir. Eyni zamanda Əli Kərimli Milli Şuraya sədr olmaq istəyir, partiyanı isə öz ata mülkü kimi Fuad Qəhrəmanlıya vermək niyyətindədir. Fuad Qəhrəmanlının partiyada heç bir nüfuzu yoxdur”.
pia.az