Zaur Məmmədov: “Cənubi Qafqaz məsələsinin yaxın bir ildə ABŞ-ın baxış bucağına daxil olacağını gözləmirəm”
“Mən deməzdim ki, Ermənistana olan yardımın kəskin şəkildə azaldılması Trampın Ermənistana heç də xoş olmayan münasibəti kimi dəyərləndirilməlidir”.
Bu sözləri politoloq Zaur Məmmədov ABŞ-ın inkişaf etməkdə olan ölkələrə ayırdığı yardımı azaltmasına münasibət bildirərkən PİA.AZ-a açıqlamasında qeyd edib.
ABŞ Dövlət Departamentinin 15 səhifəlik büdcə sənədində bildirilir ki, ABŞ Dövlət Departamenti inkişaf etməkdə olan ölkələrə yardımı üç dəfə azaldacaq və ya tamamilə ləğv edəcək. Bu ölkələr sırasında Azərbaycan da var. ABŞ-ın Azərbaycana ayırdığı yardım Ermənistana göstərilən yardımla müqayisədə çox kiçikdir.Məlumata əsasən, Ermənistana ayrılan yardım 77,3% azaldılacaq. İlk dəfədir ki, ABŞ Ermənistana olan yardımını azaldır. Bu günə qədər də Tramp Dağlıq Qarabağ məsələsi ilə bağlı açıq fikir nümayiş etdirməyib. Ermənistana olan yardımın kəskin şəkildə azaldılması Trampın Ermənistana heç də xoş olmayan münasibəti kimi dəyərləndirilə bilərmi?
Mövzu ilə bağlı PİA.AZ-ın əməkdaşı siyasi elmlər üzrə fəlsəfə doktoru, politoloq Zaur Məmmədovun fikirlərini öyrənib.
Zaur Məmmədov: “İnkişaf etməkdə olan ölkələrə ayrılan milyardlar orduya yönləndiriləcək”.
ABŞ-ın Ermənistana ayırdığı yardımı azaltmasının Trampın Ermənistana qarşı xoş olmayan münasibətindən yaranmadığını vurğulayan politoloqa görə, ABŞ həmin vəsaiti orduya ayırmağı planlaşdırır:
“Donald Tramp prezident seçiləndən sonra, özünün də, bəyan etdiyi kimi inkişaf etməkdə olan dünya ölkələrinə maliyyə yardımı məsələsində, eləcə də beynəlxalq təşkilatların maliyyələşdirilməsində mühüm azaltmalar etmək niyyətindədir. Tramp ABŞ-dan külli-miqdarda lazımsız maliyyə yardımlarının edilməsinin qəti əleyhdarıdır. Bu məqsədlə istər beynəlxalq təşkilatlara, istərsə də inkişaf etməkdə olan dövlətlərə maliyyə yardımı 2018- ci ildən başlayaraq azaldılacaq. ABŞ Beynəlxalq İnkişaf Agentliyi ilə Dövlət Departamentinin ümumi büdcəsi 37% azaldılacaq. İnkişaf etməkdə olan ölkələrə ayrılan milyardlar orduya yönləndiriləcək. Ona görə də, yeni qərarda təəccüblü heçnə yoxdur.
Mən deməzdim ki, Ermənistana olan yardımın kəskin şəkildə azaldılması Trampın Ermənistana heç də xoş olmayan münasibəti kimi dəyərləndirilməlidir. Bu, ümumi maliyyə islahatının bir hissəsidir. Təsəvvür edin, ABŞ yaxın müttəfiqi sayılan Ukraynaya yardımı 69% , yəni, 570 milyondan 170 milyona qədər azaltmağı planlaşdırır. Gürcüstana isə gələn il ABŞ-dan 47 milyon 512 min dollar əvəzinə 28 milyon dollar azaldılacaq.
Trampın Dağlıq Qarabağ məsələsi ilə bağlı açıq fikir nümayiş etdirməməsinə gəlincə, bu gün Tramp üçün Qarabağ münaqişəsi kimi bir həllediləsi problem yoxdur. O, hakimiyyətə yeni gəlib. Daxili siyasətdə ABŞ da köklü islahatlardan tutmuş müxtəlif qüvvələrlə mübarizəyə qədər, xarici siyasətdə isə Şimali Koreyadan tutmuş, Rusiya və Suriya kimi problemlər ilə məşğul olacaq. Cənubi Qafqaz məsələsinin yaxın bir ildə ABŞ-ın baxış bucağına daxil olacağını gözləmirəm. İndi, dünyada kifayət qədər aktual, qlobal problemlər var”.
Gülşən ŞƏRİF
pia.az