“Biz sübut etməliyik ki, nə mal, nə də qoyunuq”

Rüstəm İbrahimbəyov: “Bunu isə yalnız aksiyalarla etmək mümkündür”

Milli Şuranın sonuncu aksiyasından sonra daha bir neçə aksiyanın planlaşdırıldığı ilə bağlı xəbərlər yayılsa da, hələlik növbəti aksiyanın yeri və vaxtı ilə bağlı heç bir konkretlik mövcud deyil.

Əslində cəmiyyətdə, hətta müxalifət düşərgəsində belə bu cür aksiyaların keçirilməsinə münasibət kifayət qədər ziddiyyətlidir.

İndiki məqamda hansısa aksiyanın keçiriləsinə ehtiyac varmı? Bu aksiyalarla nəyəsə nail olmaq mümkündürmü? Cəmiyyətin aksiyalara lazımi dəstək verməməsi nə ilə bağlıdır?

Bununla bağlı Moderator.az-a və “Hürriyyət” qəzetinə açıqlama verən dünya şöhrətli Azərbaycan ziyalısı, məşhur kinorejissor Rüstəm İbrahimbəyov məsələ ilə bağlı maraqlı fikirlər səsləndirib. Aksiyalarla nəyisə dəyişməyin mümkünsüz olduğunu vurğulayan R.İbrahimbəyov, bundan imtina etməyin də düzgün olmadığını qeyd edib:

“Aksiyalar Azərbaycanda heç nəyi dəyişdirə bilməz. Amma aksiyalar olmasa, o zamanbununla dünya qarşısında təsdiq edəcəyik ki, biz millət deyilik, xalq deyilik. Aksiyaların əsas məqsədi odur ki, biz bununla dünya ictimaiyyətinə göstəririk ki, biz xalqıq. Biz nə mal, nə də qoyun deyilik. Təəssüf ki, aksiyalarda iştirak edən adamların sayı tədricən azalır. Təzyiqlər o qədər sərtdir ki, adi adam bunlardan çəkinib qorxur. Bu baxımdan hesab edirəm ki, aksiyalar lazımdır və həyata keçirilməlidir. Biz təsdiq etməliyik ki, xalqıq, bizim öz mövqeyimiz var və iqtidar bu mövqeylə tanış olmalıdır”.