Bu gün- mayın 5-də Qarabağ Azadlıq Təşkilatı (QAT) “İslam dünyası və Qarabağ: yeni çağırışlar” mövzusunda tədbir keçirib
Tədbirdə tanınmış siyasi, ictimai və dini xadimlər iştirak edirlər. Musavat.com xəbər verir ki, tədbir dövlət himninin səsləndirilməsi ilə başlanıb. Həmçinin torpaq uğrunda canından keçən şəhidlərin xatirəsi yad edilib.
QAT sədri Akif Nağı çıxışında bildirib ki, apreldəki hərbi əməliyyatlar bir sıra nəticələrin çıxarılması üçün vacib olub: “O cümlədən aydın oldu ki, Azərbaycan öz mövqeyində müəyyən dəyişikliklərə yer verməlidir. Birinci məqam odur ki, əməliyyatlar Azərbaycan Ordusunun gücünü göstərdi. Hamının etiraf etdiyi, düşmənlərin də etiraf etdiyi bir güc göstərdi. Azərbaycan cəmiyyətinin döyüşə hazır olduğunu göstərdi. Xalqın torpaq, vətən naminə şəhid olmağa hazır olduğunu göstərdi. Cəmiyyətdəki əhval-ruhiyyənin yüksək olduğunu göstərdi. Azərbaycan cəmiyyətində siyasi əqidəsindən, mövqeyindən asılı olmayaraq hər kəsin bir hədəfə vurduğunu göstərdi. 90-cı illərdə bu, yox idi. Məğlubiyyətimizin əsas səbəbi bu idi. Ehtiyat etdiyimiz xarici siyasi amillərlə bağlı isə deyək ki, beynəxlalq birliyin sanksiyası, təzyiqi, bunların heç biri olmadı. Beynəlxalq güclər Azərbaycanın haqlı mövqeyi ilə könülsüz də olsa hesablaşmalı oldular".
pia.az