Sovet hakimiyyəti illərində boşanmaq istəyənlərə 3 aya qədər vaxt verilirdi
Rəsmən ayrılmaq üçün məhkəməyə müraciət edən ailə üzvlərini dərhal boşamır, onlara düşünmək üçün imkan yaradırdılar.
Yasamal rayon məhkəməsinin sədri Ələddin Cəfərov hesab edir ki, həmin qaydaları bərpa etmək vaxtı çatıb. O, Bakupost.az-a açıqlamasında bildirib ki, son vaxtlar boşanma haqqında müraciətlərin sayında artım müşahidə olunur: “Düzdür, elə də böyük artım yoxdur. Amma hər halda, ayrılmaq istəyənlərin sayı ötən illərə nisbətən çoxalıb”.
Boşanma səbəblərinə gəlincə, məhkəmə sədrinin sözlərinə görə, bununla bağlı xüsusi statistika yoxdur: “Əvvəllər boşanmaq üçün məhkəməyə gələnlərə hakim 3 ay vaxt verirdi. Əksər hallarda da bu müddət ərzində ər-arvad barışırdı, gəlib ərizəni geri götürürdülər. İndi isə cəmi 1 ay ərizndə məhkəmə qərar çıxarıb boşamalıdır. Ona görə də, ailələrin dağılmasını istəmiriksə, onlara mümkün qədər çox vaxt vermək lazımdır”.