Vətən müharibəsinin şəhidi Zülfüqarlı Zeynalın cənnətdəki ilk doğum günüdür - Fotolar

Vətən, millət, haqq-ədalət yolunda tərəddüd etmədən canından keçən, ölümün gözünə dik baxan cəsarət abidəsidir şəhidlər... Torpaqlarımızın işğaldan azad edilməsi, Vətənimizin bütövlüyü uğrunda döyüşən, qanıyla tarix yazan şücaətli oğulardan biri olan Zülfüqarlı Zeynal Alim oğlunun bu gün cənnətdəki ilk doğum günüdür. Yaşasaydı 26 yaşı tamam olacaqdı. Amma Zeynal 25 illik ömrünün qalan hissəsini canından çox sevdiyi Vətənə bağışladı...
Azərbyacan Ordusunun giziri, şəhid Zülfqarlı Zeynalın doğum günü öncə Şirvan şəhər Şəhidlər Xiyabanında uyuduğu məzarı ətrafında Şəhər İcra Hakimiyyətinin başçısı İlqar Abbasov, hüququ-mühafizə orqanlarının rəhbərləri, şəhidin ailə üzvləri, dostları və ictimaiyyət nümayəndələri ilə birlikdə qeyd olundu. Əvvəlcə şəhidin əziz xatirəsi ehtiramla yad olundu, ruhuna dualar oxundu, məzarı üzərinə gül dəstələri düzüldü. Şəhər İcra Hakimiyyətinin başçısı İlqar Abbasov Müzəffər Ali Baş Komandanın rəhbərliyi ilə 44 günlük Vətən müharibəsində Azərbaycan Ordusunun qüdrətindən, şəhidlərimizin döyüş zamanı göstərdiyi qəhrəmanlıqlardan söz açdı. Bildirdi ki, prezident-ordu-xalq vəhdətinin, birliyinin, həmrəyliyinin nəticəsi olaraq torpaqlarımız düşməndən azad edildi, haqq-ədalət bərpa oldu, Şanlı Zəfər günü tariximizə şəhidlərimizin qanı ilə yazıldı. Sevinirik və qürur duyuruq ki, üçrəngli bayrağımız respublikamızın bütün guşələrində olduğu kimi, işğaldan azad edilmiş torpaqlarımızda da əzəmətlə dalğalanmaqdadır. İlqar Abbasov tarixi Qələbənin əldə olunmasında canından keçən bütün şəhidlərimizin daim xatirələrdə yaşayacağını, onların ailələrinə hər zaman hörmət və ehtiram göstəriləcəyini qeyd etdi.

Sonra Zülfüqarlı Zeynalın vaxtilə yaşadığı küçədə şəhidin xatirə lövhəsinin açılışı oldu. Açılışda Şəhər İcra Hakimiyyətinin məsul əməkdaşları, Bələdiyyə sədri, şəhid Milli Qəhrəman Murad Mirzəyevin valideynləri, Şirvan şəhərindən olan şəhid anaları Zeynalın döyüş yolundan, göstərdiyi qəhrəmanlıqdan və şücaətdən danışdılar. Tədbirdə qeyd olundu ki, Zeynal hərbiçi peşəsini seçməklə həyatını, arzularını, gələcəyini Vətənə bağışladı. Çıxış edənlər Azərbaycan xalqının qüruru, fəxri olan bütün şəhidlərimizin, o cümlədən də Zeynalın xatirəsinin daim əziz tutulacağını, şəhidlik zirvəsinə ucalan Zeynalın təkcə şirvanlıların, doğma el-obasının oğlu deyil, bütöv Azərbaycanın oğlu olduğunu, onunla hər bir azərbaycanlının qürur duyduğunu vurğuladılar. “Vətən uğrunda”, “İgidliyə görə”, “Cəbrayılın azad olunmasına görə”, “Şuşanın azad olunmasına görə”, “Kəlbəcərin azad olunmasına görə”, “Azərbaycan Ordusunun 100 illiyi” medalları ilə təltif edilən şəhidin igidliyinin və vətənpərvərliyinin gələcək nəzilllərə örnək olacağı diqqətə çatdırıldı.

PİA.az xəbər verir ki, Şəhər İcra Hakimiyyəti aparatı adından şəhidin valideynlərinə xatirə hədiyyəsi təqdim olunub. 21 nömrəli tam orta məktəbin şagirdləri şəhidlərə həsr olunmuş bədii kompazisiya ilə çıxış edibər.

Tədbirin sonunda şəhidin valideynləri şəhid ailələrinə göstərilən diqqət və qayğıya görə ölkə başçısı cənab İlham Əliyevə və Birinci vitse-prezident, çox hörmətli Mehriban xanım Əliyevaya minnətdarlıqlarını bildiribər.

Allah rəhmət eləsin!

Şəhidlər ölməz, Vətən bölünməz!