Türkiyə İdlibdə hərbi əməliyyata başladı

“Report” “Halab Today”ə istinadən xəbər verir ki, Türkiyə ordusu rejim qüvvələrinin Serakibdəki qərargahlarını reaktiv yaylım atəş sistemi vasitəsilə atəşə tutub.

Bundan başqa, sosial şəbəkələrin müxalifətə yaxın səhifələrində yayılan məlumata görə, müxalif qüvvələr Rusiyaya aid 2 kəşfiyyatçı PUA-nı və B.Əsəd qüvvələrinə məxsus 1 tankı məhv edib.

Hökumətə yaxın mənbələrin bildirdiyinə görə isə, Rusiya hərbçiləri Serakib, Neyrab və Maarat ən-Numan şəhərlərindən çəkilməyə başlayıblar.

Məlumata görə, Suriyanın Bilal Bakkour adlı generalı da öldürülüb.

“CNN Türk”ün xəbərinə görə, Türkiyə İdlibdə B.Əsəd qüvvələrinin hücumlarının qarşısını almaq üçün bölgəyə tank və xüsusi təyinatlılar göndərib, hazırda bu proses davam edir.

Qeyd edək ki, Türkiyə prezidenti Rəcəb Tayyib Ərdoğan fevralın 19-da çıxışında "İdlibdə hər an əməliyyatlara başlaya bilərik" deyib.

pia.az