Tramp Ağ Evdən canlı yayımla xalqa müraciət etdi

PİA.AZ Azadlıq Radiosuna istinadən bildirir ki, onun çıxışı televiziyayla birbaşa yayımlanıb. Prezident Meksikayla sərhədin hasarlanmasını istəyir. Buna maliyyə ayrılmaması ucbatından hökumət 18 gündür qismən qapadılıb. Konqresdəki demokratlar Trampı tənqid edir, onu federal hökuməti yenidən açmağa çağırır. Hökumətin bağlanması nəticəsində yüz minlərlə federal işçi ödənişsiz çalışır.

Yanvarın 8-də Trampın prezidentliyi dövründə ilk dəfə olaraq Oval Ofisdən etdiyi çıxış ABŞ siyasətinin necə gərgin bir dönəmə girdiyini göstərir. Noyabrda demokratlar Nümayəndələr Palatasına nəzarəti ələ alandan durum qəlizləşib. Trump sərhədin hasarlanmasına Konqresin 6 milyard dollaradək vəsait ayırmasını istəyir. Demokratlar buna qarşı çıxır. Konstitusiyaya görə, prezident konqresin razılığı olmadan bu tip layihələrə pul xərcləyə bilməz. Federal hökumət artıq dekabrın 1-dən qismən qapalıdır və bu, ABŞ tarixində ikinci uzun qapanmadır. “Cənub sərhədimizdə humanitar və təhlükəsizlik böhranı artmaqdadır”, – Tramp televiziyaların canlı yayımladığı çıxışında deyib.

Trump seçki kampaniyası zamanı immiqrasiyanı böyük problem adlandırırdı, sərhədi hasarlamağı vəd edirdi. Demokratlar isə Trampın immiqrasiya təhlükəsini şişirtdiyini iddia edir, onu federal işçilərindən hasar məsələsindən rıçaq kimi istifadə etməkdə suçlayır.

Nümayəndələr Palatasının demokratlardan olan lideri Nensi Pelosi isə televiziya çıxışında deyib ki, Tramp sərhəddə böhranı yaradıb. Senat demokratlarının lideri Çak Şumer Trampı hökuməti yenidən açmağa, sərhəddə təhlükəsizliklə bağlı danışıqları bərpa etməyə çağırıb.

pia.az