Ötən gün Lüksemburda Azərbaycanın “Qarabağ” futbol klubu ilə yerli “Düdelanj” klubu arasında oyun zamanı stadionda qondarma “dqr bayrağı” daşıyan dron qaldıranlar Belçika erməniləridir
Bu alçaqcasına təxribata görə məsuliyyəti Belçikada fəaliyyət göstərən “Birinci erməni cəbhəsi” adlı (FAF) erməni fanat qruplaşması üzərinə götürüb.
Oyundan əvvəl FAF-ın Facebook səhifəsində azarkeşləri “oyunu diqqətlə izləməyə” çağırıblar. Oyundan sonra isə qrup aksiyanı Belçikadakı erməni diasporunun təşkil etdiyi haqda sosial şəbəkələrdə bəyanat yayıb.
Xatırladaq ki, təxribata görə oyun 20 dəqiqə dayanıb. Lüksemburqun idman naziri daha sonra Azərbaycan nümayəndə heyətindən üzr istəyib. Rəsmi Bakı Lüksemburqdakı səfirə tapşırıq verib ki, təxribatı törədənlərin tapılıb cəzalandırılması üçün fəaliyyətə başlasın.
***
Azərbaycan Xarici İşlər Nazirliyi (XİN) Lüksemburqda "Düdelanj"-"Qarabağ" futbol matçı zamanı baş verən təxribatı nəzərə alaraq vəziyyəti izləyir".
Virtualaz.org bildirir ki, bunu Azərbaycan XİN Mətbuat xidmətinin rəhbəri Leyla Abdullayeva deyib.
"Lüksemburqda akkreditə olunmuş səfirə bu ölkənin Xarici İşlər Nazirliyi ilə əlaqə yaratmaq və təxribatlara cavabdeh şəxslərin tapıldığına və müvafiq məsuliyyət daşıyacaqlarına əmin olmaqla bağlı tapşırıq verilib" - L. Abdullayeva bildirib.
Qeyd edək ki, "Qarabağ" UEFA Avropa Liqasının qrup mərhələsinin II turu çərçivəsində "Düdelanj"ı məğlub edib.
Xatırladaq ki, “Düdelanj” – “Qarabağ” oyunu erməni təxribatı ilə əlaqədar dayandırılıb. Matçın 30-cu dəqiqəsində Qurban Qurbanovun rəhbərlik etdiyi kollektivin rəqib qapısına vurduğu 2-ci qoldan sonra dron vasitəsilə stadionun üzərinə qondarma “Dağlıq Qarabağ Respublikası”nın bayrağı gətirilib. Bundan sonra Ağdam təmsilçisinin üzvləri meydanı tərk ediblər. Ardınca Lüksemburqun idman naziri Dan Kerş Azərbaycan çempionunun soyunub-geyinmə otağına gələrək üzr istəyib. Nazir ölkəsinin Dağlıq Qarabağı Azərbaycanın ayrılmaz hissəsi saydığını, təxribatçıların tapılaraq cəzalandırılacağını deyib. D.Kerş üzrxahlığını stadionun diktor otağında da elan etdikdən sonra oyun davam etdirilib.
AFFA rəhbərliyi də baş vermiş erməni təxribatına reaksiya verib. Milli assosiasiya rəsmiləri dərhal UEFA ilə əlaqə saxlayaraq, narazılığını bildirib. Bu gün Avropa futbol qurumuna rəsmi qaydada müraciət olunacaq.
pia.az