“Qanuni oğru”nun qardaşına və digər şəxslərə 46 il müddətinə həbs cəzası istənilib

Kriminal aləmdə "Rafət Əlibayramlinski" kimi tanınan "qanuni oğru" Rafət Əmirovun qardaşı Rüfət Əmirov və digərlərinin cinayət işi üzrə məhkəmə iclası davam etdirilib. Həbs edilən digər şəxslər Elvin Hüseynov, Rüfət Kərimov, Kamil Əmirov, İsmayıl İbrahimovdur.

Cinayət işinə Bakı Ağır Cinayətlər Məhkəməsində hakim Samir Əliyevin sədrliyi ilə baxılır. Sonuncu prosesdə dövlət ittihamçısı təqsirləndirilən şəxslərə cəza istəyib. Prokuror Orxan Kəngərli çıxış edərək Kamil Əmirova 14 il, Rüfət Əmirova və Rüfət Kərimova 13 il, Elvin Hüseynova 12 il, Ismayıl Ibrahimova isə 7 il müddətinə cəza tələb edib.

Qeyd edək ki, Daxili İşlər Nazirliyinin yaydığı məlumata əsasən, Nəsimi Rayon Polis İdarəsinin Cinayət Axtarış Şöbəsinə Rüfət adlı bir nəfərin üzərində odlu silah gəzdirməsi barədə əməliyyat məlumatı daxil olub. Həyata keçirilən təxirəsalınmaz əməliyyat-axtarış tədbirləri nəticəsində qeyd edilən şəxs - Şirvan şəhər sakini Rüfət Əmirov saxlanılaraq idarəyə gətirilib. Onun üzərinə baxış keçirilən zaman bir ədəd “Makarov” markalı tapança, həmin silaha məxsus daraq və 7 ədəd patron aşkar olunaraq götürülüb. Saxlanılan şəxs tapançanı bir neçə il bundan əvvəl Rusiya Federasiyasından aldığını və qaçaqmalçılıq yolu ilə Azərbaycana gətirdiyini bildirib.

R.Əmirovun ətrafında həyata keçirilən əlavə əməliyyat-axtarış tədbirləri nəticəsində məlum olub ki, o, Cinayət Məcəlləsinin 144-cü (adam oğurluğu) maddəsi ilə Binəqədi Rayon Polis İdarəsi tərəfindən də axtarışdadır. Daha sonra onun barəsində aparılam istintaq dövründə onunla cinayətdə iştirak etməkdə şübhəli bilinən Elvin Hüseynov, Rüfət Kərimov, Kamil Əmirov və İsmayıl İbrahimov saxlanılıb. Onlara Cinayət Məcəlləsinin 144-cü (adam oğurluğu) maddəsi ilə ittiham verilib.(musavat.com)

pia.az